Президент Шавкат Мирзиёев 25 декабрь куни Шўртан газ-кимё мажмуасининг ишлаб чиқариш қувватини 3 баробар ошириш мақсадида яна бир янги мажмуа қурилишига старт берди, деб ёзади Президент матбуот хизмати.
Давлат раҳбарининг сўзларига кўра, лойиҳанинг қиймати 1 миллиард 800 миллион доллар бўлиб, Uzbekistan GTL заводи ёнида қурилади. Унда 430 минг тонна нефтани қайта ишлаш ҳисобига йилига 280 минг тонна полиэтилен ва 100 минг тонна полипропилен тайёрланади. Яна мингга яқин иш ўрни очилади.
Шу тариқа, Шўртанда мамлакатдаги биринчи йирик газ-кимё кластерига асос солинади. Бу кластерда маҳсулот ишлаб чиқариш ҳажми ҳозирги 290 миллион доллардан 2025 йилда 1,8 миллиард долларга етказилади. Яъни, 6 баробарга ошади.
Ушбу кластер тизимидаги корхоналар 1 долларлик хом ашёдан 10 долларлик юқори қўшилган қийматли тайёр маҳсулотлар яратади.
Шавкат Мирзиёев бугунги кунда бутун дунё «яшил иқтисодиёт»га ўтаётгани, савдо-сотиқда шу борада талаблар қўяётганини қайд этган. Uzbekistan GTL маҳсулотлари эса жаҳондаги энг юқори экологик талаблар ва стандартларга тўлиқ жавоб беради. Бу ерда тайёрланадиган синтетик ёқилғи анъанавий ёқилғиларга нисбатан 40 фоиз кам чиқинди ва зарарли газ ҳосил қилади. Бунинг ҳисобидан, йилига 13 минг 500 тонна зарарли газларнинг ҳавога тарқалишига йўл қўйилмайди.
Таъкидланишича, натижада қўшимча 550 миллион долларлик маҳсулот ишлаб чиқарилади. Ўз навбатида ушбу маҳсулотларни чуқурроқ қайта ишлаш ҳисобига 2 баробаргача кўпроқ истеъмол товарлари ишлаб чиқариш имконияти яратилади.
«Янги заводлар ҳисобига (UzGTL ва Шўртан ГКМ) Шўртан мажмуаси ҳудудида мамлакатдаги биринчи йирик газ-кимё кластери ташкил этилади», — дейди Шавкат Мирзиёев.
«Gazeta.uz»нинг Энергетика вазирлигига таяниб ёзишича, мазкур янги лойиҳанинг қиймати 1,839 миллиард долларни ташкил этади, маблағларнинг 629 миллион доллари — «Ўзбекнефтгаз»нинг ўз маблағлари бўлса, 1,21 миллион доллари — хорижий кредитлар.
Лойиҳанинг ўзини оқлаш муддати 8,5 йил, ички даромадлилик даражаси (ИРР) эса 11,7 фоизни ташкил қилади. Chevron Philipps (АҚШ), Lummus Technology (АҚШ), Novelon Technology (Германия) ва Enter Engineering (Сингапур) компаниялари лойиҳа учун лицензиат ва пудратчилар сифатида кўрсатилган.
Халқаро энергетика агентлиги ҳисоб-китобларига кўра, GTL маҳсулотларини ишлаб чиқариш 2030 йилга бориб 2 баробар ўсади. Шу боис янада юқори қўшилган қийматли бошқа турдаги маҳсулотлар ишлаб чиқариш ҳам режалаштирилган. Жумладан, завод негизида алкил-бензол, бутен ва гексен, синтетик мойлар, малеин ангидрид, эмулсион қўшимчалар, катализаторлар каби маҳсулотлар ишлаб чиқариш бўйича қиймати 620 миллион доллар бўлган 6 та лойиҳа амалга оширилиши мўлжалланган. Бу ярим тайёр маҳсулотлар кимё ва маиший кимё, текстил, чарм ва мебель, қурилиш материаллари ва электротехника каби соҳаларда кенг қўлланилади.
Изоҳ (0)