«Ҳозирда одамларни аэропортларга киритишга шунчаки шароит йўқ, аммо тез орада вазият ўзгаради» — Раъно Жўраева

Uzbekistan Airports компанияси раҳбари Раъно Жўраева нима сабабдан фуқаролар аэропорт биносига киритилмаслиги, учиб келаётганларни кутиб олмоқчи бўлган яқинлари совуқ ва жазирамада кўчада кутиши кераклиги тўғрисидаги саволга жавоб берди, деб хабар беради «Подробно».

«Айни вақтда аэропортлар биноларига кузатувчилар ва кутиб олувчиларнинг киришини чекловчи ҳукумат қарори амалда. Ислоҳотлар доирасида биз ушбу қарорнинг бекор қилиш ташаббуси билан чиқдик, чунки аллақачон янги технологиялар йўловчиларнинг транспорт хавфсизлигини таъминлаш имконини бермоқда. Аммо ҳозирда одамларни бинога қўйиш учун шунчаки шароит йўқ. Мазкур қарорни бекор қилиб, одамларнинг киритсак, тўс-тўпалон юзага келади», — дейди Uzbekistan Airports раҳбари.

Таъкидланишича, ушбу муаммо мамлакат аэропортлари майдонларини кенгайтириш ва кенг сиғимли янги аэровокзалларни қуриш бўйича амалга ошириладиган реконструкциялар жараёнида ҳал этилади. Кузатувчилар ва кутиб олувчилар учун кутиш заллари, кафе ва бошқа қулайликлар яратилади.

Аввалроқ Раъно Жўраева Ўзбекистонда аэропортлар хусусийлаштирилмаслиги, чунки «бундай соғин сигир ўзимизга ҳам кераклиги» ҳақида гапирган эди. Шунга қарамай, Ўзбекистон томони аэропортларнинг турли элементларини ривожлантириш учун хусусий инвестицияларни жалб этишга тайёр. Бу борада давлат-хусусий шерикчилик имкониятларидан кенг фойдаланиш мумкин.