Ўзбекистон 2021 йилнинг 1—20 декабрь кунлари 60,4 минг тонна картошка импорт қилган. Бу ҳақда Иқтисодий тараққиёт ва камбағалликни қисқартириш вазирлиги маълумотларига таяниб, EastFruit хабар берди.
Таҳлилчиларнинг баҳолашича, ушбу маҳсулот импорти ҳажми 2021 йилнинг 1 январидан 20 декабрига қадар 516,2 минг тоннани ташкил этган. Бу бутун 2020 йил давомидаги импортдан 23 фоизга кўп демак. Шу билан бирга, республика ҳукумати импортга боғлиқликни камайтириш мақсадида 2022 йилда картошка экиладиган майдонлар сонини кескин оширишни режалаштирмоқда.
Бундан олдинги рекорд 2020 йилда қайд этилган: Ўзбекистон ўтган йили 421 минг тонна картошка импорт қилган — бу ундан олдинги йилдаги кўрсаткичга нисбатан қарийб 1,5 баробарга кўп. 2016 йилга қадар мамлакатда картошка импорти йилига 50 минг тоннадан ошмаган, 2017 йилда эса мазкур маҳсулот импорти 194 минг тоннага чиқиб кетган. 2017 йилдан 2021 йилга қадар мос равишда импорт ҳажми 2,7 баробарга ошган.
Қишлоқ хўжалиги вазирлиги 2022 йилда республикада 122 минг гектар майдонга картошка экилишини маълум қилган, бу 2021 йилга нисбатан 40 фоизга кўп.
Эслатиб ўтамиз, 2021 йилнинг февралида президент Шавкат Мирзиёев Наманган вилоятига ташрифи давомида қишлоқ хўжалиги соҳасини ривожлантиришга оид бир қанча лойиҳалар билан танишаркан, Ўзбекистонда картошкачилик йўналишига катта аҳамият қаратиш зарурлигини қайд этганди. «Ўзбекистон шароитида ердан самарали фойдаланишимиз керак. Қайси ҳудудга қандай навдаги картошка экиш бўйича тажрибамиз етарли эмас. Илмий ёндашув йўқлиги боис картошкани ҳам кўнгилдагидек етиштира олмаяпмиз», — деган эди давлат раҳбари.
Изоҳ (0)