Ижтимоий тармоқларда Тошкент туманида жойлашган мактаблардан бирининг спортзалида ўқувчилар ўртасида оммавий жанжал содир бўлгани тасвирланган видео тарқалди. Туман ИИБ матбуот хизматининг маълум қилишича, видеода тасвирланган ҳолат 30 ноябрь куни баскетбол мусобақаси вақтида келиб чиққан.
Маълум қилинишича, 2021 йил 30 ноябрь куни соат тахминан 10:00 ларда Тошкент туманида жойлашган 9-мактаб спортзалида туман ХТБга қарашли 18 ва 31- сонли умумтаълим мактабларининг ўқувчилари ўртасида баскетбол мусобақаси бўлиб ўтган.
Мусобақада кузатувчи бўлган С.А. (2001 йил туғилган) спорт залда ўзаро жанжаллашаётган мактаб ўқувчиларининг безорилик ҳаракатларининг олдини олиш чорасини кўраётган Х.V.нинг (вояга етмаган 2004 йил туғилган) ҳеч бир сабабсиз юз соҳасига уриб тан жароҳати етказган.
Судга оид тиббий экспертизага кўра, жабрланувчи Х.V. соғлиғининг қисқа муддатга бузилишига олиб келган енгил тан жароҳати олган.
Мазкур ҳолат юзасидан 17 декабрь куни Тошкент тумани ИИБ Тергов бўлими томонидан фуқаро С.А. га нисбатан Жиноят кодексининг 277-моддаси (безорилик) 3-қисми «г» банди билан жиноят иши қўзғатилган. Тергов ҳаракатлари олиб борилмоқда.
Шунингдек, ИИБ масъуллари томонидан кейинчалик мактабларда шу каби ҳолатларнинг олдини олиш юзасидан мактаб раҳбарияти ва ўқувчилари иштирокида профилактик суҳбат ўтказилиб, ушбу ҳолат муҳокамага қўйилган. Жараёнда кузатувчи бўлган айрим ўқувчи ва мактаб ходимлари огоҳлантирилган.
Аввалроқ Термиз давлат университети ҳудудида оммавий муштлашув бўлгани, Сурхондарёда мактаб ўқувчилари муштлашгани, Тошкентда икки мактаб ўқувчилари ўзаро жанжаллашгани тўғрисида хабар берилганди.
Изоҳ (0)