Тошкентдаги Миллий боғ ҳудудида Маънавият шаҳарчаси қурилади. Бу ҳақда Тошкент шаҳар ҳокими Жаҳонгир Ортиқхўжаевнинг «2021 йилги ижтимоий-иқтисодий ривожланиш якунлари ва 2022 йилга режалар тўғрисида» мурожаатида сўз боради.
Унга кўра, Тошкентда қурилиш соҳасида келгуси 2022 йилда бир қатор йирик объектларни топшириш режалаштирилган. Хусусан, Алишер Навоий номидаги халқаро илмий-тадқиқот маркази, Ўзбекистон Миллий кутубхонаси, Ўзбек миллий академик драма театри ва Ўзбекистон давлат санъат музейини ўз ичига олган янги, улкан мажмуа – Маънавият шаҳарчаси шулар жумласидан. Ушбу қурилишлар Миллий боғ ҳудудида амалга оширилмоқда.
Шунингдек, мурожаатда келтирилишича, Ислом цивилизация маркази қурилиш ишлари давом эттирилади. Спорт мусобақалари бўйича Осиё ва Жаҳон чемпионатларини ўтказиш мақсадида Янги Ўзбекистон кўчаси бўйлаб Олимпия шаҳарчасини бунёд этиш юзасидан қурилиш ишлари бошланади. Пойтахтда 12 та «яшил ҳудуд» ва хиёбон ҳамда 25 та аллея ташкил этилади.
Дастурга мувофиқ, 2022 йилда 7 та каналларнинг қирғоқларини мустаҳкамлаш, ободонлаштириш, кўкаламзорлаштириш ва сайилгоҳ ташкил этиш, шунингдек, мавжуд гидротехник иншоотларни таъмирлаш ҳамда сув ресурсларини такомиллаштириш ишлари амалга оширилади.
Эслатиб ўтамиз, Алишер Навоий номидаги Ўзбекистон Миллий боғи 2017 йилдан бери катта қурилиш майдонига айланган. 2020 йилнинг майида боғнинг Ўзбекистон ёзувчилари уюшмасига туташ қисмида Адиблар хиёбони ташкил этилди, ҳудуддаги Алишер Навоий ҳайкали ҳам хиёбонга мослаб қайта ўрнатилди. 2021 йил июнида эса собиқ Миллий боғ ўрнида салкам тўрт йил қурилган Magic City аттракционлар парки очилди. Бу орада 2021 йилнинг апрелида Миллий боғнинг бошқа чеккасида жойлашган ва Корхоналарни соғломлаштириш маркази сифатида фойдаланиш учун тўлиқ таъмирдан чиқарилган «Наврўз» тўйхонаси кутилмаганда бузила бошланди.
Изоҳ (0)