Qashqadaryo viloyatining Chiroqchi tumanidagi 3 ta maktab o‘quvchi qizlari o‘zaro janjallashdi. Holat aks etgan video ijtimoiy tarmoqlarda tarqaldi.

Foto: Videodan kadr

Viloyat IIB matbuot xizmatining ma’lum qilishicha, holat 20-sentabr kuni Chiroqchi tumani 2-, 4- va 5-umumiy o‘rta ta’lim maktablari 9-, 10-, 11-sinfining 3 nafar o‘quvchisi o‘rtasida yuz bergan. Ular oldindan bo‘lgan kelishmovchilik sababli 1-umumiy o‘rta ta’lim maktabi ma’muriy binosiga borganda o‘zaro gaplashish vaqtida janjallashib qolgan.

Hozirda mazkur holat yuzasidan 1-umumiy o‘rta ta’lim maktabida ichki ishlar organlari, xalq ta’lim bo‘limi va mahalla fuqarolar yig‘ini faollari hamda ota-onalar ishtirokida janjalning kelib chiqish sabablari o‘rganilib, muhokama qilinmoqda.

Hozirda barcha o‘quvchilarning ota-onalariga nisbatan Ma’muriy javobgarlik to‘g‘risidagi kodeksning 47-moddasi (bolalarni tarbiyalash va ularga ta’lim berish borasidagi majburiyatlarni bajarmaslik) tartibida hujjatlar rasmiylashtirilgan.