Андижон вилоятида аҳолига хизмат кўрсатишда қонунбузилиш ҳолатларини содир этиб, фуқароларнинг норозилигига сабаб бўлган хизмат кўрсатувчи ташкилотларнинг 214 нафар мансабдорлари маъмурий жавобгарликка тортилди. Бу ҳақда «Дарё» мухбири Умиджон Мамарасулов хабар бермоқда.
Давлат хизматлари агентлиги Андижон вилояти бошқармаси ахборот хизматининг маълум қилишича, бошқарманинг давлат органлари ва бошқа ташкилотлар томонидан давлат хизматлари кўрсатилиши устидан назорат қилиш бўлими томонидан 2021 йил давомида жами 11 518 та қонун бузилиш ҳолати аниқланган бўлиб, ушбу кўрсаткич 2020 йилга нисбатан 1626 тага ортган.
Уларнинг 10 976 таси муддатни бузиш, 218 таси тўғридан-тўғри хизмат кўрсатиш, 9 таси асоссиз рад қилиш, 26 таси ортиқча ҳужжат талаб қилиш ва 289 таси бошқа тусдаги қонун бузилишларни ташкил қилган.
Давлат хизматларини кўрсатишдаги ноқонуний ҳаракатлар бўйича энг кўп қонунбузилиш ҳолатлари соғлиқни сақлаш муассасаларида (3754 та), «Андижон ҳудудий электр тармоқлари» корхонаси (2411 та), Андижон сув таъминот филиали корхоналари (1686 та), ер ресурслари ва давлат кадастри идоралари (1265 та) ҳамда солиқ органлари (789 та) томонидан содир этилган.
Қолган қонун бузилиш ҳолатлари эса ички ишлар органлари, Қурилиш вазирлигининг ҳудудий бўлинмалари, таълим муассасалари, ҳокимликлар, молия, санитария–эпидемиологик осойишталик ва жамоат саломатлик хизмати, бандлик ва меҳнат муносабатлари идоралари ҳисобига тўғри келган.
Аниқланган ҳолатлар юзасидан 217 та ёзма огоҳлантириш ва 16 та тақдимнома киритилган ҳамда давлат хизмат кўрсатувчи ташкилотларининг мансабдор ва масъул ходимларининг 218 нафарига нисбатан баённома расмийлаштирилиб, улар тегишли тартибда маъмурий жазога тортилган бўлса, яна 34 нафар ходимга нисбатан эса интизомий таъсир чоралари қўлланилган.
«Президентимизнинг 2021 йил 23 мартдаги фармонига асосан 2021 йилнинг 1 июнидан бошлаб, 18 турдаги маълумот ва ҳужжатнинг аҳоли ҳамда тадбиркорлардан талаб қилиниши бекор қилинган. Бироқ ҳанузгача давлат ва хўжалик бошқарув органлари, давлат муассасалари ва маҳаллий давлат ҳокимияти органлари томонидан айрим ташкилот ва муассасалар томонидан руҳий касалликлар ёки наркология бўйича диспансер ҳисобида туриши ёки турмаслиги, судланганлик, солиқ қарзи бор ёки йўқлиги каби маълумотномаларни, шахсни тасдиқловчи ҳужжатнинг нусхаси, белгиланган шаклдаги фотосурати, кадастр ҳужжатлари, меҳнат дафтарчалари ва уларнинг нусхалари талаб қилиш ҳолатлари учрамоқда. Тезкор ва қулай давлат хизматлари кўрсатилиши талаб қилинаётган бир вақтда мутасаддиларнинг бундай қонунбузилиш ҳолатлари содир этиши аҳолининг норозилигини оширмоқда», — дейди ДХА вилоят бошқармаси бошлиғи ўринбосари Абдураҳмон Алимов.
Изоҳ (0)