Бюронинг Наманган шаҳар бўлимида шаҳар судининг 2021 йил 4 октябрдаги ижро варақасига асосан ашёвий далил сифатида олинган қалбаки 19 500 АҚШ доллари йўқ қилинди. Бу ҳақда «Дарё» мухбири Азизбек Абдувалиев хабар бермоқда.
МИБ Наманган шаҳар бўлими бошлиғининг ўринбосари Аҳаджон Абдухалиловнинг маълум қилишича, Наманган шаҳрида истиқомат қилувчи Насимжон Пахритдинов қирғизистонлик Алимардон деган шахс билан тил бириктириб, қалбаки 19 500 АҚШ долларни ҳақиқий 12 минг долларга алмаштиришга келишади. Қалбаки пулларга харидор ҳам тайёр эди.
Жиноий гуруҳ Косонсой туманида сохта пулларни ҳақиқийсига алмаштираётган чоғида ҳуқуқни муҳофаза қилувчи идоралар вакиллари томонидан ашёвий далиллар билан қўлга олинди.
Суриштирувлар чоғида гуруҳ олдин ҳам шундай ишга қўл ургани ва 6800 қалбаки АҚШ долларини 4000 ҳақиқий долларга алмаштириб, пул ўтказмалари орқали хорижга чиқариб юборгани аниқланди.
2021 йил 23 декабрь куни МИБ Наманган вилоят бошқармасида сохта 19 500 доллар журналист ва блогерлар иштирокида ёқиб юборилди.
Бошқарма матбуот хизматига кўра, Наманганда 2021 йилнинг шу кунига қадар МИБ томонидан қалбаки валюта билан боғлиқ 4 та ҳужжат ижроси доирасида умумий ҳисобда сохта 46 650 АҚШ доллари йўқ қилинган.
Изоҳ (0)