Рустам Қобилов Самарқанд вилояти ҳокимининг туризм, спорт, маданият, маданий мерос ва оммавий коммуникациялар масалалари бўйича ўринбосари — вилоят туризм ва спорт бош бошқармаси бошлиғи лавозимига тайинланди. Бу ҳақда вилоят ҳокимлиги матбуот хизмати хабар берди.
Маълум қилинишича, Самарқанд вилояти ҳокимининг туризм, спорт, маданият, маданий мерос ва оммавий коммуникациялар масалалари бўйича ўринбосари — вилоят туризм ва спорт бош бошқармаси бошлиғи Ботиржон Нуруллаев бошқа ишга ўтиши муносабати билан ўз аризасига асосан эгаллаб турган вазифасидан озод этилган.
Рустам Қобилов тайинловга қадар Ўзбекистон президенти ҳузуридаги Давлат хизматларини ривожлантириш агентлиги Самарқанд вилояти ҳудудий филиали раҳбари лавозимида фаолият юритиб келаётганди. У бундан аввал, 2018 йил апрель ойидан 2020 йилнинг сентябрига қадар вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари вазифасида ишлаган.
Шунингдек, вилоят ҳокимининг ўринбосари — маҳалла ва оилани қўллаб-қувватлаш бошқармаси бошлиғи Асқар Умаров ҳам бошқа ишга ўтиши муносабати билан ўз аризасига асосан эгаллаб турган вазифасидан озод этилган.
Ушбу лавозимга шу кунга қадар Самарқанд вилояти Бандлик бош бошқармаси бошлиғи лавозимида фаолият олиб борган Исроил Жабборов тайинланган.
Аввалроқ Наманган вилояти ҳокимининг ўринбосари Уйчи туманига ҳоким бўлгани, Бухорода бир нечта туман ҳокимлари ўзгаргани, Оқдарё туманига янги ҳоким тайинлангани тўғрисида хабар берилганди.
Изоҳ (0)