БМТнинг болалар фонди (ЮНИСЕФ) Япония ҳукуматининг гранти доирасида 433 минг долларни Сурхондарё вилоятидаги бирламчи тиббиёт муассасаларини қўллаб-қувватлашга йўналтиради. Бу ҳақда ташкилотнинг Ўзбекистондаги ваколатхонаси хабар берди.
Дастур доирасида Сурхондарё вилоятининг Термиз туманидаги бирламчи тиббиёт-санитария муассасаларида сув, санитария ва гигиена (ССГ) тизимини яхшилаш бўйича махсус тадбирлар амалга оширилади.
Сув қувурларини ўтказиш, сув таркибини юмшатиш ва фильтрлаш қурилмалари ва сув резервуарларини ўрнатиш, санитария иншоотларини қуриш ва таъмирлаш, электр ва иссиқ сув учун қуёш панеллари ва чиқиндиларни қайта ишлаш иншоотларини қуриш шулар жумласидан. Шу билан бирга, замонавий ССГ инфратузилмаси доимий равишда ишлашини таъминлаш учун унинг эксплуатацияси ва техник хизмат кўрсатиш амалга оширилади.
ЮНИСЕФ лойиҳани 2022 йилнинг мартидан 2023 йилнинг февралигача бўлган давр мобайнида амалга оширади. Термиз туманининг 80 мингга яқин аҳолиси еттита бирламчи соғлиқни сақлаш муассасаларида такомиллаштирилган ССГ хизматларидан фойдаланишлари ҳамда маиший чиқиндиларни утилизация қилишнинг ишончли тизимидан фойдаланиш имкониятига эга бўлишлари кутилмоқда. Шунингдек, улар гигиена бўйича ахборот материаллари билан таъминланади.
Аввалроқ соғлиқни сақлаш вазири Беҳзод Мусаев ССВ тизимидаги талабга жавоб бермайдиган барча санитария-гигиена хоналарини таъмирдан чиқариш бўйича кўрсатма берганди.
Изоҳ (0)