Andijonda eng ko‘p qonun buzilishiga yo‘l qo‘yib, fuqarolarning noroziligiga sabab bo‘lgan tashkilotlar nomi ma’lum qilindi

Andijon viloyatida aholiga xizmat ko‘rsatishda qonunbuzilish holatlarini sodir etib, fuqarolarning noroziligiga sabab bo‘lgan xizmat ko‘rsatuvchi tashkilotlarning 214 nafar mansabdorlari ma’muriy javobgarlikka tortildi. Bu haqda “Daryo” muxbiri Umidjon Mamarasulov xabar bermoqda.

Davlat xizmatlari agentligi Andijon viloyati boshqarmasi axborot xizmatining ma’lum qilishicha, boshqarmaning davlat organlari va boshqa tashkilotlar tomonidan davlat xizmatlari ko‘rsatilishi ustidan nazorat qilish bo‘limi tomonidan 2021-yil davomida jami 11 518 ta qonun buzilish holati aniqlangan bo‘lib, ushbu ko‘rsatkich 2020-yilga nisbatan 1626 taga ortgan.

Ularning 10 976 tasi muddatni buzish, 218 tasi to‘g‘ridan to‘g‘ri xizmat ko‘rsatish, 9 tasi asossiz rad qilish, 26 tasi ortiqcha hujjat talab qilish va 289 tasi boshqa tusdagi qonun buzilishlarni tashkil qilgan.

Davlat xizmatlarini ko‘rsatishdagi noqonuniy harakatlar bo‘yicha eng ko‘p qonunbuzilish holatlari sog‘liqni saqlash muassasalarida (3754 ta), “Andijon hududiy elektr tarmoqlari” korxonasi (2411 ta), Andijon suv ta’minot filiali korxonalari (1686 ta), yer resurslari va davlat kadastri idoralari (1265 ta) hamda soliq organlari (789 ta) tomonidan sodir etilgan.

Qolgan qonun buzilish holatlari esa ichki ishlar organlari, Qurilish vazirligining hududiy bo‘linmalari, ta’lim muassasalari, hokimliklar, moliya, sanitariya–epidemiologik osoyishtalik va jamoat salomatlik xizmati, bandlik va mehnat munosabatlari idoralari hisobiga to‘g‘ri kelgan.

Aniqlangan holatlar yuzasidan 217 ta yozma ogohlantirish va 16 ta taqdimnoma kiritilgan hamda davlat xizmat ko‘rsatuvchi tashkilotlarining mansabdor va mas’ul xodimlarining 218 nafariga nisbatan bayonnoma rasmiylashtirilib, ular tegishli tartibda ma’muriy jazoga tortilgan bo‘lsa, yana 34 nafar xodimga nisbatan esa intizomiy ta’sir choralari qo‘llanilgan.

“Prezidentimizning 2021-yil 23-martdagi farmoniga asosan 2021-yilning 1-iyunidan boshlab, 18 turdagi ma’lumot va hujjatning aholi hamda tadbirkorlardan talab qilinishi bekor qilingan. Biroq hanuzgacha davlat va xo‘jalik boshqaruv organlari, davlat muassasalari va mahalliy davlat hokimiyati organlari tomonidan ayrim tashkilot va muassasalar tomonidan ruhiy kasalliklar yoki narkologiya bo‘yicha dispanser hisobida turishi yoki turmasligi, sudlanganlik, soliq qarzi bor yoki yo‘qligi kabi ma’lumotnomalarni, shaxsni tasdiqlovchi hujjatning nusxasi, belgilangan shakldagi fotosurati, kadastr hujjatlari, mehnat daftarchalari va ularning nusxalari talab qilish holatlari uchramoqda. Tezkor va qulay davlat xizmatlari ko‘rsatilishi talab qilinayotgan bir vaqtda mutasaddilarning bunday qonunbuzilish holatlari sodir etishi aholining noroziligini oshirmoqda”, — deydi DXA viloyat boshqarmasi boshlig‘i o‘rinbosari Abdurahmon Alimov.