Самарқанд вилояти Оқдарё туманидаги «Лаззат» ошхонасида 19 декабрь куни газ портлаши содир бўлган эди. Бирламчи маълумотларга кўра, 10 нафар фуқаро тан жароҳати олиб, туман шифохонасига олиб борилган. Оқдарё туман тиббиёт бирлашмасининг шошилинч тез тиббий ёрдам бўлими шифокорлари беморларни республика шошилинч тез тиббий ёрдам илмий маркази (РШТТЁИМ) Самарқанд филиали (халқ тилида «Хавоси» дейилади) комбустиология бўлимига юборилганини маълум қилган.
РШТТЁИМ Самарқанд филиали комбустиология бўлимига келтирилган 10 нафар бемордан фақатгина К.Т. билан суҳбатлашишнинг имкони бўлди.
Уйдагиларим ҳали ҳеч нарсадан хабари йўқ
Асли наманганлик, 4 йилдан буён ушбу ошхонада ишлаб келаётган К.Т. биз билан суҳбатда уйдагилари ҳали ҳеч нарсадан хабари йўқлигини билдирди.
«Ўзим Наманганданман. 4 йилдан бери шу ерда ишлайман. Ҳали уйдагиларим менинг аҳволимдан хабари йўқ», — дея гап бошлади К.Т. (жабрланувчининг илтимосига кўра номи сир сақланди). — «Соат 13:30-14:00 атрофида газ ёниб турган ҳолатда портлаб кетди. Билмай қолдим. Аланганинг ичида қолиб кетдим. Бошқа ҳеч нарсани билмайман».
Ҳолат юзасидан воқеа гувоҳлари билан суҳбатлашганимизда улар ошхонада газ баллоннинг тагига шам ёқилиши оқибатида портлаш содир бўлганини билдирганди. Газ баллонидаги конденсатни эритиш учун шам ёққанини сўраганимизда К.Т. бундай воқеа рўй бермаганини айтди.
Газнинг ҳиди чиқяпти деб айтдим...
Ишга кирганига бор йўғи 4 ой бўлган яна бир бемор боқувчисини йўқотгани учун икки нафар фарзандини боқиш мақсадида шу ерга ишга кирган.«Келиним шу ерда ишчи бўлиб ишлайди. Коса-товоқ ташийди. Ширин овқат пиширгани учун соат 14:00 дан кейин ишчиларга овқат тайёрлайди. Овқатни тагини қовураётганида газнинг иси чиқаётганини айтган. Лекин эътиборсизлик қилган. Шам ёққани ёки бошқа ҳолатни билмайман. Газ ҳиди чиқаётганини билдирган», — дейди Замира Зикирова. — «Келинимнинг айтишича, овқатнинг тагини солиб, эшикдан чиқиши билан портлаган. Иккинчи эшикдан чиқишга улгурмаган. Иккинчи эшикдан чиқишида яна портлаш бўлган. Юзлари аянчли куйган. Келиним боқувчисини йўқотган, икки нафар ёш боласи бор».
Замира Зикирова келини билан гаплашган, бироқ нечта одам шифохонага келганини сўрамаган. Бошқа жабрланувчиларнинг айтишича, ўндан ортиқ киши шифохонага келтирилган.
Мавзуга доир: Самарқандда газ баллони портлаган ошхонадан фоторепортаж
Энам бозордан чиқишда чой ичиб кетай деб кирган...
«Энам бозордан чиқишда чой ичиб кетай, деб кирган экан. Сомса ва ‘пирожки’ еб, чиқишда эшикнинг олдидан ўтганда портлаб кетган. Чиқишга улгурмаган. Чиқаман деганда оёғининг тагига бир нарса тушиб қолган. Ўшанда йиқилиб чиқолмай қолган. Шифокорлар ‘20 фоиз куйган’ деди. Қолган ҳолатини айтгани йўқ. Ўша ерга ҳар замонда кириб овқат ерди. Кеча ҳам бир кириб чой ичиб кетай деб кирган экан», — дейди Орзигул Холмирзаева.
«Официантка» бўлиб бир кунга борганди...
Яна бир беморнинг яқини Қобил Турсунниёзовнинг айтишича, жабрланганлар 30 нафар. Шулардан 11 нафари жуда оғир жароҳатланган. Энг кўп жароҳатланганлар 5 нафарини ташкил қилади. Ўртачаси 6 нафар. Беш кишининг ичида 3 нафарининг яшаши оғир аҳволда.
«Шифокорлар ‘Ҳали ёш, агар ўзида интилиш бўлса яхши бўлади. 3 кун ичида маълум бўлади. Уч кун кўтарса ўтади, кўтармаса бизлар жавоб беролмаймиз’ деди. «Официантка» бўлиб бир кунга борганди. Аввал ишлаб, кейин бўшаб кетганди. Олдиндан ўзи шундай бўлган экан. Газ камайдими бирдан келиб газни тагига шам ёқ ёки плитка қўй, газни баланд қилиб туриш керак, тамом. Ўша куни мен бориб кўрмаганман. Аммо ҳамма шам ёққан деб айтяпти. Бу ерда кўрганлар ҳам бор. Шифохонадаги беморлар зўрға гапиряпти. Уларнинг гапиришга ҳоли йўқ. Кетса шу газ баллонига 20 минг сўм кетади. Фойда қиладиган бўлса, камида кунига 2—3 миллион сўм фойда қилади. 20 минг сўм билан оти дунё бўлиб қолмайди-ку», — дейди Қобил Турсунниёзов.
Реанимациядаги 3 нафар беморнинг аҳволи стабил оғир
РШТТЁИМ Самарқанд филиали комбустиология бўлими мудири Эркин Ҳакимовнинг «Дарё» мухбирига маълум қилишича, 19 декабрь куни 14:30 да Оқдарё туманининг «Лаззат» ошхонасида пропан газ баллонининг ёрилиб кетиши оқибатида 10 киши оловдан жароҳат олиб, Оқдарё туман шифохонасига тушган. Ўша ерда тўғридан-тўғри биринчи ёрдам кўрсатилиб, РШТТЁИМ Самарқанд филиали комбустиология бўлимига ётқизилган.
«10 нафар бемордан 3 нафари реанимацияда ётибди. 65, 70 ва 75 фоиз катта куйиш бўлган. Қолган олти нафар бемор 15, 20, 25 фоиз куйиш билан бўлимда ётибди. Битта бемор 5 фоиз куйгани учун амбулатор даволаниш учун жавоб берилган. Реанимациядаги 3 нафар беморнинг аҳволи стабил оғир. Аҳволида ижобий ўзгаришлар бор. Куйган касал тез яхши бўлмайди. Бунга вақт керак. Аста-секин яхши бўлиб кетади. Барча дори-дармонлар етарли», — дейди комбустиология бўлими мудири Эркин Ҳакимов.
«Президент тадбиркорларни текширма деб айтган»
«Дарё» мухбири билан суҳбатда бўлган жабрланувчиларнинг яқинлари ҳозирги пайтда тадбиркорларни ҳеч қайси ташкилот кириб фаолиятини ўргана олмагани учун ҳам улар истаганича қонунни бузиб ишлаётганидан шикоят қилди.
« ‘Пожарнийъга нега бориб текширмайсизлар, фақат одамларнинг уйини текшираверасизларми десам, ‘президент тадбиркорларни текширма деб айтган’ дейди. Ахир, текширмаса, бу шам ёқиб қўй дегани эмас-ку», — дейди Замира Зикирова.
Изоҳ (0)