Туркманистонда 17 декабрь куни бўлиб ўтган Вазирлар Маҳкамаси йиғилишида мамлакат президенти Гурбангули Бердимуҳамедов дипломатларга Туркманистонни дунёга янада танитиш билан шуғулланиш вазифасини топширди. Бу ҳақда «Хроника Туркменистана» хабар берди.
Нашрнинг Туркманистон давлат ахборот агентлигига таяниб хабар беришича, хорижий давлатларда ишлайдиган дипломатлар ҳозир Ашхободда. Шу муносабат билан Бердимуҳамедов уларга иш жойига қайтишда сўнгги вақтларда чиқарилган ва дунёнинг турли тилларида нашр этилган бадиий асарлар тўплами, китоб ва журналларни ўзи билан олиб кетишни буюрди.
«Нашрлар дипломатик ваколатхоналаримиз фаолиятига ёрдам беради ва туркман халқининг миллий-маданий қадриятларини оммалаштиришга, шунингдек, бетарафлигимиз асосларини яхшироқ тушунтиришга хизмат қилади», — деди Бердимуҳамедов.
Гурбангули Бердимуҳамедов 12 декабрь куни Халқаро бетарафлик куни шарафига Ашхобод қабул марказида ҳукумат ва парламент аъзолари ҳамда хорижий дипломатлар иштирокида зиёфат уюштирганди. Унда Туркманистон президенти меҳмонларга «Яшасин тинч ҳаёт!» номли янги шеърини ўқиб берган.
15 декабрь куни Ашхободда Бердимуҳамдеовнинг янги шеърига бағишланган «Arkadagyň parahatçylyk ýörelgesi – dünýä nusgalyk görelde» («Аркадағнинг тинчлик тамойили — бу бутун дунё учун модель) номли тантанли конференция бўлиб ўтди. Тадбирда маданият ва санъат соҳаси етакчилари ҳамда намояндалари, шоир ва носирлар, оммавий ахборот воситалари ходимлари, ёшлар иштирок этган.
Аввалроқ Бердимуҳамедов Туркманистон дипломатларига мамлакатларни бетараф дўстлар гуруҳига жалб қилиш юзасидан топшириқ берганди.
Изоҳ (0)