Ижтимоий тармоқларда Тошкент шаҳар Чилонзор тумани Ободонлаштириш бошқармаси ходимларига маош тўлаш кечиктирилаётгани тўғрисида хабарлар тарқалди. Туман ҳокимлиги матбуот хизматининг маълум қилишича, ҳолат бўйича билдирилган эътирозлар юзасидан Чилонзор ҳокими ходимлар билан мулоқот ўтказган.
Ижтимоий тармоқларда Чилонзор тумани Ободонлаштириш бошқармаси ишчилари бир неча ойдан бери ойлик маошни тўлиқ миқдорда олишмаётгани, доимий кечиктирилиши ва қисқартилишидан норози бўлиб, Чилонзор тумани ҳокимлиги биноси олдида тўплангани тасвирланган видео тарқалди. «Ҳашар бўлса, биринчи бўлиб олиб кетишади… Қани маош? Олдинги ойлик 300 минг сўм кам чиқди», «Аванс йўқ, байрамга мукофот пули йўқ», «Ҳамма жойда разрядлар бор (меҳнатга ҳақ тўлашнинг — таҳр.), бизда эса йўқ. Ойликлар ҳам кам», «Кийиниш хоналари йўқ… Ҳатто ҳожатхонага чиқишга рухсат беришмайди», дейди ишчилар.
Таъкидланишича, туман ҳокими Шавкат Мавлонов ходимлар билан юзма-юз мулоқот ўтказган. Мулоқот жараёнида ишчи ходимларнинг декабрь ойи аванс маошлари кечиктирилаётгани маълум бўлган.
Туман молия бўлими томонидан билдирилган изоҳга кўра, Молия вазирлигининг 2021 йил 4 январдаги 1-сон ва Тошкент шаҳар Молия бош бошқармасининг 2021 йил 6 февралдаги 41-сонли буйруқларига мувофиқ маҳаллий бюджетдан молиялаштириладиган 1-даражали маош ойлик тўловлари ҳар ойнинг 20-санасига қадар тўлиқ молиялаштирилиши мумкин.
Шундай бўлса-да, мулоқот жараёнида туман Молия бўлими томонидан ишчи ходимларга тегишли маблағлар «Ipoteka bank»и Чилонзор филиалига ўтказилган, банк томонидан эса ходимларнинг пластик карталарига 17 декабрь куни соат 12:00 да ўтказиб берилган.
Бундан ташқари, туман ҳокими томонидан ишчи хизматчиларнинг қўшимча таклифлари инобатга олинган:
- бошқарма ходимларини кийиниш хонаси билан таъминлаш таклифи лойиҳасини ишлаб чиқиш туман ҳокимининг ўринбосари А.Аҳмедовга;
- ходимларнинг фаолиятига алоқадор автоулов масаласини ўрганиб чиқиб, ечими борасида таклиф киритиш туман ҳокимининг ўринбосари Н.Абдураҳмонов, туман молия мудири Ж.Хожиманов ва туман Ободонлаштириш бошқармаси раҳбари А.Нурмуҳаммедовларга;
- иш меҳнатига қўлланадиган ягона тариф 3-разряд бўйича берилаётган маошни қайта ҳисоблаш, моддий рағбатлантириш, махсус рағбатлантириш фонди ҳисобидан таклифларини ишлаб чиқиш туман ҳокимининг ўринбосари Н.Абдураҳмонов, туман молия мудири Ж.Хожиманов ва туман Ободонлаштириш бошқармаси бош ҳисобчиси Г.Куатбаеваларга юклатилган.
Аввалроқ Қашқадарёда ишчиларидан салкам 2 миллиард сўм қарздорлиги бўлган ташкилот ходимлари вилоят ҳокимлигида тўплангани тўғрисида хабар берилганди.
Изоҳ (0)