Ijtimoiy tarmoqlarda Toshkent shahar Chilonzor tumani Obodonlashtirish boshqarmasi xodimlariga maosh to‘lash kechiktirilayotgani to‘g‘risida xabarlar tarqaldi. Tuman hokimligi matbuot xizmatining ma’lum qilishicha, holat bo‘yicha bildirilgan e’tirozlar yuzasidan Chilonzor hokimi xodimlar bilan muloqot o‘tkazgan.
Ijtimoiy tarmoqlarda Chilonzor tumani Obodonlashtirish boshqarmasi ishchilari bir necha oydan beri oylik maoshni to‘liq miqdorda olishmayotgani, doimiy kechiktirilishi va qisqartilishidan norozi bo‘lib, Chilonzor tumani hokimligi binosi oldida to‘plangani tasvirlangan video tarqaldi. “Hashar bo‘lsa, birinchi bo‘lib olib ketishadi… Qani maosh? Oldingi oylik 300 ming so‘m kam chiqdi”, “Avans yo‘q, bayramga mukofot puli yo‘q”, “Hamma joyda razryadlar bor (mehnatga haq to‘lashning — tahr.), bizda esa yo‘q. Oyliklar ham kam”, “Kiyinish xonalari yo‘q… Hatto hojatxonaga chiqishga ruxsat berishmaydi”, deydi ishchilar.
Ta’kidlanishicha, tuman hokimi Shavkat Mavlonov xodimlar bilan yuzma-yuz muloqot o‘tkazgan. Muloqot jarayonida ishchi xodimlarning dekabr oyi avans maoshlari kechiktirilayotgani ma’lum bo‘lgan.
Tuman moliya bo‘limi tomonidan bildirilgan izohga ko‘ra, Moliya vazirligining 2021-yil 4-yanvardagi 1-son va Toshkent shahar Moliya bosh boshqarmasining 2021-yil 6-fevraldagi 41-sonli buyruqlariga muvofiq mahalliy budjetdan moliyalashtiriladigan 1-darajali maosh oylik to‘lovlari har oyning 20-sanasiga qadar to‘liq moliyalashtirilishi mumkin.
Shunday bo‘lsa-da, muloqot jarayonida tuman Moliya bo‘limi tomonidan ishchi xodimlarga tegishli mablag‘lar “Ipoteka bank”i Chilonzor filialiga o‘tkazilgan, bank tomonidan esa xodimlarning plastik kartalariga 17-dekabr kuni soat 12:00 da o‘tkazib berilgan.
Bundan tashqari, tuman hokimi tomonidan ishchi xizmatchilarning qo‘shimcha takliflari inobatga olingan:
- boshqarma xodimlarini kiyinish xonasi bilan ta’minlash taklifi loyihasini ishlab chiqish tuman hokimining o‘rinbosari A.Ahmedovga;
- xodimlarning faoliyatiga aloqador avtoulov masalasini o‘rganib chiqib, yechimi borasida taklif kiritish tuman hokimining o‘rinbosari N.Abdurahmonov, tuman moliya mudiri J.Xojimanov va tuman Obodonlashtirish boshqarmasi rahbari A.Nurmuhammedovlarga;
- ish mehnatiga qo‘llanadigan yagona tarif 3-razryad bo‘yicha berilayotgan maoshni qayta hisoblash, moddiy rag‘batlantirish, maxsus rag‘batlantirish fondi hisobidan takliflarini ishlab chiqish tuman hokimining o‘rinbosari N.Abdurahmonov, tuman moliya mudiri J.Xojimanov va tuman Obodonlashtirish boshqarmasi bosh hisobchisi G.Kuatbayevalarga yuklatilgan.
Avvalroq Qashqadaryoda ishchilaridan salkam 2 milliard so‘m qarzdorligi bo‘lgan tashkilot xodimlari viloyat hokimligida to‘plangani to‘g‘risida xabar berilgandi.
Izoh (0)