Декабрь ойининг биринчи ярмида Ашхободда полиция кузовида қора деталларга эга бўлган автомобилларга қарши навбатдаги рейдларни ўтказди, деб хабар беради «Хроника Туркменистана».
2018 йилнинг январидан бошлаб Туркманистонда оқдан бошқа барча рангдаги автомобилларга яширин тақиқ жорий этилган. 2020 йилнинг кузида полициячилар кузовидаги айрим деталлари, масалан, эшик тутқичлари, орқани кўришга мўлжалланган ойналари ва бамперлари қора бўлган машиналарни тўхтатишни бошлаган.
2021 йилда эса пойтахтнинг кўплаб кўчаларида беш-олти нафар полициячи туриб олиб, барча автомобилларни тўхтатган. Ҳайдовчининг ҳужжатларида ёки машина рангига оид муаммолар аниқланса, автомобиль зудлик билан жарима майдончасига юборилган. Икки кун ичида Чоганлидаги полиция бошқармаси биноси олдидаги майдонча машинага тўлиб кетган ва қоидабузар автомобиллар пойтахтнинг Юбилейний кўчасидаги бошқа йирик автотураргоҳга жўнатила бошланган.
Натижада у ерда 200 га яқин автомобиль тўпланган. Эрта тонгдан ва автотураргоҳ ёпилгунига қадар у ерга кўплаб одамлар келган. Ҳайдовчилар жаримани тўлаш учун узоқ навбатда турган, полициячилар билан келишишга уринган. Автотураргоҳнинг кириш қисмига жарималарни тўлаш учун мўлжалланган кассага эга контернер ўрнатилган.
Таъкидланишича, айрим автомобиль эгалари автотураргоҳнинг ўзида машинанинг қора деталларини бўяган. Уларнинг сўзларига кўра, бу сафар полициячилар фақатгина йирик деталлар — қора бампер, радиатор панжаралари ёки орқани кўришга мўлжалланган кўзгу билан чекланмаган, балки корпусдаги кичик қора деталларга ҳам эътироз билдирган. Масалан, ҳайдовчилар кўзгулар қотирилган қора пластикларни оқ рангга бўяшга мажбурланган.
Toyota Hilux пикапларининг эгаларида эса оригинал ёрлиқлари сабаб муаммо юзага келган — ушбу моделлардаги каби безаклар мамлакатда эндиликда тақиқланган. Ҳайдовчилар майдончанинг ўзида уларни фен билан қиздириб, юлиб ташламоқда.
Шунингдек, олдинроқ бўялган ранг куйиб, корпуснинг асосий рангидан фарқланиб қолган бўлса ҳам, машинани бўяш талаб этилмоқда.
Айни вақтда рейдлар тугаган, аммо айрим ҳайдовчилар ҳар эҳтимолга қарши машиналарининг барча деталларини оқ рангга бўяб чиққан. Айрим ҳайдовчиларнинг қайд этишича, бу ёрдам бермайди ва полициячилар «барибир камчилик топади». Улар бу каби рейдларнинг мақсади байрам олдидан жарима тўплаш эканига ишонмоқда.
Эслатиб ўтамиз, 2014 йилда туркманистонлик мансабдорлар қора Mercedes’ларини оқ рангдагиларига алмаштиришга мажбур қилинганди. 2015 йилда Туркманистонда қора рангдаги автомобилларни мамлакатга олиб кириш тақиқлаб қўйилгани ҳақида хабарлар тарқалган.
Изоҳ (0)