Юнусободда қурилиш режалаштирилган ҳудуддаги 10 та қарағай арралаб кетилди

14 декабрь куни тунда Тошкентнинг Юнусобод туманида номаълум шахслар қурилиш режалаштирилаётган ҳудуддаги 10 та дарахтни арралаб кетди. Бу ҳақда Тошкент шаҳар экология ва атроф-муҳитни муҳофаза қилиш бошқармаси хабар берди.

Мутахассис сўзларига кўра, ҳозирда ушбу масала ўрганилмоқда. «Ҳозирда ҳудуддаги камераларни очиб кўриш билан шуғулланяпмиз, Худо хоҳласа, ҳаммасини топмоқчимиз», — дейди у.

Ҳудудда истиқомат қилувчи аҳолининг таъкидлашича, аввалроқ ҳам дарахтларни қуритишга уринишлар бўлган. Қурилиш амалга ошиши керак бўлган ҳудуд олдин ўраб олинган, арчаларни қуритиш учун таглари кесиб чиқилган.

Туман ҳокимлиги мутасаддиси мазкур майдон тадбиркорга аукцион орқали сотилганини айтган. Маълум муддат ўтиб эса дарахтлар сабаб қурилишга рухсат берилмаган.

«Бу ерни шаҳар ҳокимининг қарори асосида аукционда ютиб олган. Фуқаролар билан юзага келган можароларда биз жойига чиқиб, ўрганган эдик. Экологияга (қўмита — таҳр.) мурожаат қилган, бироқ мораторий қимматбаҳо дарахт бўлгани учун кўчиришга рад жавобини берган.

Воқеа жойига тадбиркор ҳам чақирилган, аммо у келмаган.

Экология инспектори дарахтларни сақлаб қолиш имкони борлигини маълум қилиб, «Ботаника боғи» мутахассиси шикаст етган дарахтларни сақлаб қолишга ёрдам беришини билдирган.

«Gazeta.uz» Экология ва атроф-муҳитни муҳофаза давлат қўмитасининг матбуот хизматига ҳолат бўйича изоҳ сўраб мурожаат қилган. Шаҳар экоқўмитасига таяниб фуқаро Ж.Газибаева номига расмийлаштирилган 0,0115 гектар ҳудудда ўсаётган 10 та қарағайга шикаст етгани тасдиқланган.

Амир Темур ва Чинобод кўчалари кесишмасидаги яшил зона яқинида жойлашган кўп қаватли уйлардан бирида яшовчи аёлнинг тахминича, «қурувчи аҳолининг қурилишга рухсат бермаётганидан тинчлана олмаяпти».

Ўрганишлар давомида диаметри 28, 26,7, 37, 18, 27,7, 25, 23,8, 21, 18,7 ва 22,2 сантиметрли дарахтлар арралангани аниқланган.

Аввалроқ Жаҳонгир Ортиқхўжаев Тошкентда дарахтлар кесилишида ҳокимликнинг ҳам айби борлигини тан олгани, Тошкентда 81 та дарахтнинг кесилишига оид тергов иши қайта тиклангани тўғрисида хабар берилганди.