14-dekabr kuni tunda Toshkentning Yunusobod tumanida noma’lum shaxslar qurilish rejalashtirilayotgan hududdagi 10 ta daraxtni arralab ketdi. Bu haqda Toshkent shahar ekologiya va atrof-muhitni muhofaza qilish boshqarmasi xabar berdi.
Mutaxassis so‘zlariga ko‘ra, hozirda ushbu masala o‘rganilmoqda. “Hozirda hududdagi kameralarni ochib ko‘rish bilan shug‘ullanyapmiz, Xudo xohlasa, hammasini topmoqchimiz”, — deydi u.
Hududda istiqomat qiluvchi aholining ta’kidlashicha, avvalroq ham daraxtlarni quritishga urinishlar bo‘lgan. Qurilish amalga oshishi kerak bo‘lgan hudud oldin o‘rab olingan, archalarni quritish uchun taglari kesib chiqilgan.
Tuman hokimligi mutasaddisi mazkur maydon tadbirkorga auksion orqali sotilganini aytgan. Ma’lum muddat o‘tib esa daraxtlar sabab qurilishga ruxsat berilmagan.
“Bu yerni shahar hokimining qarori asosida auksionda yutib olgan. Fuqarolar bilan yuzaga kelgan mojarolarda biz joyiga chiqib, o‘rgangan edik. Ekologiyaga (qo‘mita — tahr.) murojaat qilgan, biroq moratoriy qimmatbaho daraxt bo‘lgani uchun ko‘chirishga rad javobini bergan.
Voqea joyiga tadbirkor ham chaqirilgan, ammo u kelmagan.
Ekologiya inspektori daraxtlarni saqlab qolish imkoni borligini ma’lum qilib, “Botanika bog‘i” mutaxassisi shikast yetgan daraxtlarni saqlab qolishga yordam berishini bildirgan.
“Gazeta.uz” Ekologiya va atrof-muhitni muhofaza davlat qo‘mitasining matbuot xizmatiga holat bo‘yicha izoh so‘rab murojaat qilgan. Shahar ekoqo‘mitasiga tayanib fuqaro J.Gazibayeva nomiga rasmiylashtirilgan 0,0115 gektar hududda o‘sayotgan 10 ta qarag‘ayga shikast yetgani tasdiqlangan.
Amir Temur va Chinobod ko‘chalari kesishmasidagi yashil zona yaqinida joylashgan ko‘p qavatli uylardan birida yashovchi ayolning taxminicha, “quruvchi aholining qurilishga ruxsat bermayotganidan tinchlana olmayapti”.
O‘rganishlar davomida diametri 28, 26,7, 37, 18, 27,7, 25, 23,8, 21, 18,7 va 22,2 santimetrli daraxtlar arralangani aniqlangan.
Avvalroq Jahongir Ortiqxo‘jayev Toshkentda daraxtlar kesilishida hokimlikning ham aybi borligini tan olgani, Toshkentda 81 ta daraxtning kesilishiga oid tergov ishi qayta tiklangani to‘g‘risida xabar berilgandi.
Izoh (0)