Филиппинда минглаб одамлар мамлакат қирғоқларига кучли тайфун яқинлашиб келаётгани сабаб хавфсиз жойга эвакуация қилинди. Бу ҳақда Associated Press агентлигига таяниб, «Korrespondent.net» хабар берди.
«Рей» тайфуни жанубий Суригао дел Норте провинциясидан 175 километр шарқда қайд этилган. У баъзида тезлиги соатига 230 километрга етаётган шамол ёрдамида ғарб томон ҳаракатланмоқда. 16 декабрь кунининг иккинчи ярмида у мамлакат жануби-шарқидаги Динагат оролига ёпирилиши мумкин.
Шу билан бирга, айрим жанубий ва марказий провинцияларга тайфун сабаб пўртанадан огоҳлантиришлар кетмоқда. Маҳаллий аҳолидан қирғоқдан ва пастликдаги қишлоқлардан, сув тошқинлари ва кўчкилар юз бериши мумкин бўлган хавфли туманлардан узоқроқда бўлиш сўралмоқда.
Филиппин қирғоқ хизмати кемаларга юқори хавф эҳтимоли бор зоналарга чиқишни тақиқлади, паромлар ва ўнлаб портлардаги юк кемалари иши тўхтатилди. Қутқарувчилар эвакуация ва қутқарув операцияларига тайёрланмоқда. Ўнлаб ички авиарейслар бекор қилинган.
Ўн минглаб аҳоли мактаб ва ҳукумат биноларида жойлашган хавфсиз ҳудудларга эвакуация қилинган. Айрим одамларни мажбуран эвакуация қилишга тўғри келган. Шу билан бирга, ҳукумат «омикрон» хавфи сабаб бир жойда кўплаб одамларни тўплашдан қочишга уринмоқда.
Эслатиб ўтамиз, Филиппинда апрель ойида «Суригай» тайфуни содир бўлиб, 60 минг киши эвакуация қилинганди. Ўшанда шамол тезлиги 195 километр соатга етиб, уйларнинг томини вайрон қилган ва дарахтларни қўпориб ташлаган.
Изоҳ (0)