Экология ва атроф-муҳитни муҳофаза қилиш давлат қўмитасининг 16 декабрь куни видеоселектор тарзидаги йиғилишида қўмита тизимида мурожаатлар билан ишлаш ҳолати танқидий таҳлил қилинди. Бу ҳақда қўмита ахборот хизмати хабар қилди.
Маълум қилинишича, қўмита раиси ўринбосари И.Боқижонов бошқарган мажлисда кун тартибидаги масала юзасидан ҳудудий бошқармалар раҳбарларининг ҳисоботлари тингланган. Тошкент вилояти Экология ва атроф-муҳитни муҳофаза қилиш бошқармаси бошлиғи лавозимидан озод этилган. Бунга ҳудудлар кесимида таҳлил қилинганда энг кўп мурожаат Тошкент вилоятга тўғри келиши, уларнинг аксарияти белгиланган муддатда ҳал қилинмагани, ҳудудда соҳага оид масалаларни кўриб чиқишда тизимли камчиликларга йўл қўйилгани, бошқарма бошлиғининг масъулиятсизлиги сабаб бўлган.
Қўмита сайтида келтирилган маълумотга кўра, ушбу лавозимда Бахтиёр Жўраев фаолият юритиб келган.
Шунингдек, мурожаатларни кўриб чиқишда сусткашликка йўл қўйган 14 нафар масъулга хайфсан интизомий чораси қўлланилган.
Қайд этилишича, 2021 йилнинг 11 ойида қўмитага жисмоний ва юридик шахслардан жами 6697 та мурожаат келиб тушган. Кўрсаткич ўтган йилнинг мос даврига нисбатан 1,75 баравар кўпайган. Шундан Президент виртуал қабулхонаси орқали 4665 та, оғзаки шаклда 1215 та, тўғридан-тўғри ёзма равишда 817 та мурожаат келиб тушган.
Таъкидланишича, мурожаатларнинг 5735 таси қаноатлантирилган, 814 таси тушунтирилган, 204 таси рад этилган, 17 таси тааллуқлилиги бўйича жўнатилган.
Эслатиб ўтамиз, август ойида Экология ва атроф-муҳитни муҳофаза қилиш давлат қўмитаси раиси Алишер Мақсудов лавозимидан озод этилганди. Шавкат Мирзиёев масалага тўхталиб, «Ташаббус ва амалий ишлари кўринмаяпти. Шу боис мен Экология қўмитаси раҳбарини ишдан олдим», деган.
Шунингдек, Наманганда кўчат экиш жараёнига сохталик билан ёндашган масъуллар лавозимидан озод қилинган.
Изоҳ (0)