Олий Мажлис Қонунчилик палатаси депутати Расул Кушербаев Яккасарой туманидаги дарахтзорни кесиш факти бўйича очилган жиноят иши натижаларига аниқлик киритиш мақсадида Тошкент прокуратураси ва Экология ва атроф-муҳитни ҳимоя қилиш қўмитасига расмий сўровлар юборганини маълум қилди, деб ёзади «Gazeta.uz».
2020 йилнинг февралида Building and Supplies компанияси Юнус Ражабий кўчасидаги бир нечта турар жой бинолари орасидаги 0,5 гектар майдонга кўп қаватли уйларни қуришни режалаштирган эди. Компания амалдаги мораторийга қарамасдан, 81 та дарахтни кесиб ташлагани жамоатчилик норозилигига сабаб бўлган ва шаҳар раҳбарияти ҳамда ҳукуматининг эътиборини тортганди.
Дарахтларни кесишга рухсат берган Яккасарой туман ҳокимининг ўринбосари Абдувосилхон Сатторовга нисбатан Жиноят кодексининг 205-модда (ҳокимият ёки мансаб ваколатини суиистеъмол қилиш) 2-қисми «а» банди, Building and Supplies таъсисчиси Абдураҳим Қодировга нисбатан эса 198-модда (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 2-қисми билан билан жиноят иши қўзғатилган.
Ўшанда айбланувчилардан 1,89 миллиард сўм зарар ундирилган. Ички ишлар бўлими бошлиғи ва туман прокурорига ҳайфсан берилган. Аҳоли кесилган дарахтлар жойини ҳимоя қилишга муваффақ бўлган, у ерга янги дарахтлар экилган.
Давлат экология қўмитаси депутатнинг сўровига ундирилган маблағлар ҳамон Тошкент прокуратураси ҳисобида эканини маълум қилган.
Пойтахт прокуратураси Расул Кушербаев 9 ноябрь куни йўллаган сўровга жавоб қайтармаган. Бу ҳақда ўзининг Telegram каналида хабар берган депутат кўп ўтмай постни ўчириб ташлаган ва босим бўлгани тўғрисидаги саволларга изоҳ бермаган.
Бош прокуратуранинг нашрга тасдиқлашича, 1,89 миллиард сўм ростдан ҳам шаҳар прокуратураси ҳисобида турибди. Идора маълумотларига кўра, жиноят иши бўйича тергов 2020 йилнинг 10 июлида Жиноят-процессуал кодексининг 364-модда (дастлабки терговни тўхтатиш асослари ва тартиби) 1-қисми билан тўхтатилган.
«Айни вақтда тергов ҳаракатлари давом этмоқда. Жиноят иши бўйича якуний қарор қабул қилинганидан кейин шаҳар прокуратураси депозит ҳисоб рақамида сақланаётган маблағ тақдири ҳал қилинади», — дейилади Бош прокуратура хабарида.
Аввалроқ Жаҳонгир Ортиқхўжаев Тошкентда дарахтлар кесилишида ҳокимликнинг ҳам айби борлигини тан олгани тўғрисида хабар берилганди.
Изоҳ (0)