Шавкат Мирзиёев Корея Республикаси президенти Мун Чжэ Иннинг таклифига биноан 16 декабрь куни давлат ташрифи билан Жанубий Кореяга жўнаб кетди. Бу ҳақда Президент матбуот хизмати хабар қилди.
Қайд этилишича, ташриф давомида Сеул шаҳрида олий даражада учрашув ва музокаралар ўтказиш, Жанубий Корея парламенти раҳбарияти ва етакчи компаниялари вакиллари билан учрашиш кўзда тутилган.
Маълум бўлишича, кун тартибидан Ўзбекистон—Корея алоҳида стратегик шериклик муносабатларини ва кўп қиррали ҳамкорлигини, энг аввало, «яшил» иқтисодиёт, инвестиция ва инновациялар, рақамли технологиялар, ижтимоий соҳа каби устувор йўналишларда янада кенгайтириш масалалари ўрин олган.
Аввалроқ президент Жанубий Кореяга 16 декабрь куни бориши кутилаётгани, 16—18 декабрь кунлари бўлиб ўтадиган ташриф якунида икки томонлама ҳужжатлар тўплами имзоланиши хабар қилинганди.
Декабрь ойининг 5-санасида Шавкат Мирзиёев Қозоғистонга давлат ташрифи билан борганди. Уни Нур-Султон аэропортида Қозоғистон президенти кутиб олган. Ташриф давомида Шавкат Мирзиёев Қозоғистон биринчи президенти Нурсултон Назарбоев билан учрашган, Қозоғистондаги Ўзбекистон элчихонасининг янги биноси очилишида қатнашган ва Нур-Султондаги Рақамли ҳукумат офисига ташриф буюрган.
Изоҳ (0)