Ўзбекистонда талабаларнинг тўлов-контракт суммасини тўлаш муддати 2021 йилнинг 31 декабрига қадар узайтирилди, деб хабар бермоқда Олий ва ўрта махсус таълим вазирлиги.
Маълум қилинишича, Вазирлар Маҳкамаси ҳузуридаги Таълим муассасаларига ўқишга қабул қилиш бўйича Давлат комиссиясининг 15 декабрдаги қарорига мувофиқ, 2021/2022-ўқув йилида олий таълим муассасалари бакалавриати ва магистратурасига тўлов-контракт, шу жумладан, табақалаштирилган тўлов-контракт асосида талабаликка тавсия этилган абитуриентлар, ўқиши кўчирилган (кўчириб тикланган) ва қайта тикланган талабалар ўқиши учун тўлов ҳақини ўтказиш ҳамда талабалар сафига қабул қилишни расмийлаштиришнинг сўнгги муддати 2021 йилнинг 31 декабри этиб белгиланган.
Шунингдек, коронавирус инфекциясига қарши 15 ноябрга қадар тўлиқ эмланган (вакцина олган), лекин эмланганлик тўғрисидаги сертификатни белгиланган муддатдан кечикиб олий таълим муассасасига тақдим этган абитуриентлар ва талабаларга тўлов-контракт суммасини тўлашда бир марталик 10 фоизли чегирмани қўллашга рухсат берилган.
Эслатиб ўтамиз, Олий ва ўрта махсус таълим вазирлиги Ўзбекистон ОТМларига қабул қилинган талабаларнинг янги 2021/2022-ўқув йили учун тўлов-контракт миқдорларини эълон қилганди. Кейинроқ вазирлик ОТМларда контракт миқдори ошгани юзасидан муносабат билдириб, Президентининг фармон ва ҳукумат қарорлари билан иш ҳақи миқдорлари оширилганда тўлов-контракт нархлари ҳам оширилиб борилишини маълум қилган.
Бундан ташқари, 2021 йилнинг апрель ойида Ўзбекистонда COVID-19 га қарши вакцина олган талабаларга контракт тўлашда чегирма берилиши, кейинчалик вакцина олган талабаларга чегирма бериш муддати 15 ноябргача узайтирилиши хабар қилинганди.
Изоҳ (0)