Деновдаги портлашдан зарарланган савдо дўконида бир кун олдин қанча мол-мулк борлиги ҳисоб-китоб қилингани маълум бўлди

Сурхондарё вилоятининг Денов туманида портлашдан зарарланган савдо мажмуаси — «Indenim»да қанча миқдорда мол-мулк борлиги ҳисоб-китоб қилингани айтилди. Бу ҳақда Денов шаҳрида вилоят ҳокими Тўра Боболов, соғлиқни сақлаш вазирининг биринчи ўринбосари Амрулло Иноятов, Бош прокуратура бошқарма бошлиғи ўринбосари Дониёр Масалиев, Фавқулодда вазиятлар вазирлиги бош бошқарма бошлиғи Ўлмас Музаффаров иштирокидаги матбуот брифингида маълум қилинди, дея хабар берди «Дарё» мухбири.

Матбуот брифингида сўз олган вилоят раҳбари Тўра Боболов портлашдан зарарланган савдо мажмуасида қанча мол-мулк борлиги бир кун олдинги ҳисоб-китоб қилинганини билдирди.

« ‘Indenim’ савдо мажмуасида ‘Indenim’ савдо дўконининг ўзи ва 12 та тадбиркорлик субъекти фаолият юритган. Айни кунда олиб борилаётган тергов жараёнида маълум бўлишича, тадбиркорлар савдо мажмуасида бир кун олдин камерал текширув ўтказиб, савдо уйида қанча мол-мулк бўлганини аниқлаган. Бу ҳақда улар айни кунда ўтказилаётган тергов жараёнларида маълум қилган», — деди вилоят ҳокими Тўра Боболов.

Тўра Боболов «Дарё» мухбирининг мазкур маълумотдан келиб чиқиб берилган қўшимча саволи — савдо мажмуасининг бир кун олдинги ҳисоб-китобига кўра қанча мол-мулк бўлгани тўғрисидаги саволга аниқлик киритмаган. Бироқ бу ҳақда тергов якунида маълумот берилишини қўшимча қилган.

Матбуот брифингида сўз олган Бош прокуратура вакили Дониёр Масалиев портлаш юзасидан ўша куни Бош прокуратура томонидан жиноят иши қўзғатилганини билдирган. Аммо айнан Жиноят кодексининг қайси моддалари билан жиноят иши қўзғатилганига аниқлик киритмаган.

«Содир бўлган ҳолат юзасидан ўша куни Бош прокуратура томонидан Жиноят кодексининг тегишли моддалари билан жиноят иши қўзғатилиб, тезкор тергов гуруҳи тузилди. Шунингдек, 10 дан ортиқ экспертизалар тайинланиб, уларни республикадан келган энг малакали мутахассислар ўтказмоқда», — дейди Бош прокуратура бошқарма бошлиғи ўринбосари Дониёр Масалиев.

Дониёр Масалиев воқеа жойида портлатувчи модда қўлланилганини, шунингдек ёнғин нефть маҳсулотлари ёрдамида юзага келган бўлиши мумкинлиги ҳақидаги маълумотини рад этишини билдирган.

«Мутахассисларнинг дастлабки маълумоти савдо мажмуасидаги портлаш бирор бир портлатувчи модда ёки нефть маҳсулоти ёрдамида юзага келганини инкор этмоқда. Дастлабки тахминларимиз ва мутахассисларнинг ўрганишлари бинодаги портлаб мавжуд газ қувурларида йиғилиб қолган газ ва ҳаво аралашмасининг қўшилган ҳолатда чақнаш юзага келганини кўрсатмоқда. Аммо бу якуний хулоса эмас. Ўрганиш ишлари давом этмоқда», — дейди Бош прокуратура масъули.

Дониёр Масалиев ўрганиш натижалари якуни бўйича ОАВ вакилларига қўшимча маълумот берилишини билдирди.

«Дарё» мухбири билан суҳбатлашган маҳаллий аҳоли вакиллари портлаш содир бўлишидан икки кун аввал савдо мажмуасига одамлар киритилмаганини, савдо уйида савдо-сотиқ амалга оширилмаганини билдирган. Шунингдек, портлаш содир бўлган маҳаллада яшовчи 71 ёшли Жума бобо Норов ҳам портлаш уюштирилган бўлиши мумкинлигини тахмин қилганди.

Эслатиб ўтамиз, Сурхондарёнинг Денов шаҳри марказидаги «Indenim» савдо мажмуасида 7 декабрь тонгида кучли портлаш юз берди. Расмий маълумотларга кўра, портлаш оқибатида камида икки киши ҳалок бўлган, тўққиз киши турли тан жароҳатлари билан шифохонага ётқизилган.

ФВВ Давлат ёнғин назоратини ташкил этиш бошқармаси бошлиғи Ўлмас Музаффаровнинг таъкидлашича, савдо мажмуасида газ асбоб-ускуналаридан фойдаланиш қоидаларининг бузилиши оқибатида тўпланган газ-ҳаво аралашмасининг чақнаши портлашнинг асосий сабаби ҳисобланади.