Surxondaryo viloyatining Denov tumanida portlashdan zararlangan savdo majmuasi — “Indenim”da qancha miqdorda mol-mulk borligi hisob-kitob qilingani aytildi. Bu haqda Denov shahrida viloyat hokimi To‘ra Bobolov, sog‘liqni saqlash vazirining birinchi o‘rinbosari Amrullo Inoyatov, Bosh prokuratura boshqarma boshlig‘i o‘rinbosari Doniyor Masaliyev, Favqulodda vaziyatlar vazirligi bosh boshqarma boshlig‘i O‘lmas Muzaffarov ishtirokidagi matbuot brifingida ma’lum qilindi, deya xabar berdi “Daryo” muxbiri.
Matbuot brifingida so‘z olgan viloyat rahbari To‘ra Bobolov portlashdan zararlangan savdo majmuasida qancha mol-mulk borligi bir kun oldingi hisob-kitob qilinganini bildirdi.
“ ‘Indenim’ savdo majmuasida ‘Indenim’ savdo do‘konining o‘zi va 12 ta tadbirkorlik subyekti faoliyat yuritgan. Ayni kunda olib borilayotgan tergov jarayonida ma’lum bo‘lishicha, tadbirkorlar savdo majmuasida bir kun oldin kameral tekshiruv o‘tkazib, savdo uyida qancha mol-mulk bo‘lganini aniqlagan. Bu haqda ular ayni kunda o‘tkazilayotgan tergov jarayonlarida ma’lum qilgan”, — dedi viloyat hokimi To‘ra Bobolov.
To‘ra Bobolov “Daryo” muxbirining mazkur ma’lumotdan kelib chiqib berilgan qo‘shimcha savoli — savdo majmuasining bir kun oldingi hisob-kitobiga ko‘ra qancha mol-mulk bo‘lgani to‘g‘risidagi savolga aniqlik kiritmagan. Biroq bu haqda tergov yakunida ma’lumot berilishini qo‘shimcha qilgan.
Matbuot brifingida so‘z olgan Bosh prokuratura vakili Doniyor Masaliyev portlash yuzasidan o‘sha kuni Bosh prokuratura tomonidan jinoyat ishi qo‘zg‘atilganini bildirgan. Ammo aynan Jinoyat kodeksining qaysi moddalari bilan jinoyat ishi qo‘zg‘atilganiga aniqlik kiritmagan.“Sodir bo‘lgan holat yuzasidan o‘sha kuni Bosh prokuratura tomonidan Jinoyat kodeksining tegishli moddalari bilan jinoyat ishi qo‘zg‘atilib, tezkor tergov guruhi tuzildi. Shuningdek, 10 dan ortiq ekspertizalar tayinlanib, ularni respublikadan kelgan eng malakali mutaxassislar o‘tkazmoqda”, — deydi Bosh prokuratura boshqarma boshlig‘i o‘rinbosari Doniyor Masaliyev.
Doniyor Masaliyev voqea joyida portlatuvchi modda qo‘llanilganini, shuningdek yong‘in neft mahsulotlari yordamida yuzaga kelgan bo‘lishi mumkinligi haqidagi ma’lumotini rad etishini bildirgan.
“Mutaxassislarning dastlabki ma’lumoti savdo majmuasidagi portlash biror bir portlatuvchi modda yoki neft mahsuloti yordamida yuzaga kelganini inkor etmoqda. Dastlabki taxminlarimiz va mutaxassislarning o‘rganishlari binodagi portlab mavjud gaz quvurlarida yig‘ilib qolgan gaz va havo aralashmasining qo‘shilgan holatda chaqnash yuzaga kelganini ko‘rsatmoqda. Ammo bu yakuniy xulosa emas. O‘rganish ishlari davom etmoqda”, — deydi Bosh prokuratura mas’uli.
Doniyor Masaliyev o‘rganish natijalari yakuni bo‘yicha OAV vakillariga qo‘shimcha ma’lumot berilishini bildirdi.
“Daryo” muxbiri bilan suhbatlashgan mahalliy aholi vakillari portlash sodir bo‘lishidan ikki kun avval savdo majmuasiga odamlar kiritilmaganini, savdo uyida savdo-sotiq amalga oshirilmaganini bildirgan. Shuningdek, portlash sodir bo‘lgan mahallada yashovchi 71 yoshli Juma bobo Norov ham portlash uyushtirilgan bo‘lishi mumkinligini taxmin qilgandi.
Eslatib o‘tamiz, Surxondaryoning Denov shahri markazidagi “Indenim” savdo majmuasida 7-dekabr tongida kuchli portlash yuz berdi. Rasmiy ma’lumotlarga ko‘ra, portlash oqibatida kamida ikki kishi halok bo‘lgan, to‘qqiz kishi turli tan jarohatlari bilan shifoxonaga yotqizilgan.
FVV Davlat yong‘in nazoratini tashkil etish boshqarmasi boshlig‘i O‘lmas Muzaffarovning ta’kidlashicha, savdo majmuasida gaz asbob-uskunalaridan foydalanish qoidalarining buzilishi oqibatida to‘plangan gaz-havo aralashmasining chaqnashi portlashning asosiy sababi hisoblanadi.
Izoh (0)