Surxondaryoning Denov shahri Mustaqillik ko‘chasida joylashgan ikki qavatli “Indenim” savdo majmuasida 7-dekabr kuni soat 03:57 da portlash sodir bo‘ldi. Favqulodda vaziyatlar vazirligi axborotiga ko‘ra, portlash natijasida savdo majmuasi binosi devorlari qulab tushgan.

Yong‘in-qutqaruv bo‘linmalari soat 04:02 voqea joyiga yetib borib, chaqnash natijasida sodir bo‘lgan yong‘inni soat 04:25 da o‘chirgan.

“Chaqnash natijasida 9 nafar fuqaro tan jarohati olgan bo‘lib, ular shahar shifoxonasiga yotqizilgan”, — deyiladi FVV axborotida. Ijtimoiy tarmoqlarda qoldirilgan xabarlarda majmua yonidagi yangi qurilgan turar joy binolari ham portlashdan zarar ko‘rgan bo‘lishi mumkinligi ta’kidlangan.

Hodisa joyiga bosh vazir birinchi o‘rinbosari Ochilboy Ramatov boshchiligidagi hukumat komissiyasi safarbar etilgan. Komissiya tarkibiga IIV, FVV, Milliy Gvardiya, Sog‘liqni saqlash vazirligi va boshqa idoralar vakillari kiritilgan.

FVV axborotida qo‘shimcha qilinishicha, hozirda mazkur holat yuzasidan dastlabki tergovoldi surishtiruv ishlari olib borilmoqda.