Шавкат Мирзиёев 6 декабрь куни Қозоғистонга ташрифи давомида мамлакат биринчи президенти Нурсултон Назарбоев билан учрашди. Бу ҳақда Президент матбуот хизмати хабар қилди.
Маълум қилинишича, суҳбат аввалида давлат раҳбари элбошини декабрь ойининг биринчи санасида нишонланадиган Қозоғистон биринчи президенти куни билан самимий қутлаган. Шунингдек, Назарбоев олиб борган сиёсат туфайли мамлакат барча соҳаларда муваффақиятга эришгани таъкидланган.
Қайд этилишича, учрашувда икки томонлама ва минтақавий ҳамкорлик масалалари муҳокама қилинган. Марказий Осиё маконида сиёсий мулоқот фаоллашгани, Маслаҳат учрашувлари механизми йўлга қўйилгани, дўстлик ва ишонч муҳити шакллангани борасида фикр алмашилган.
Таъкидланишича, Шавкат Мирзиёев учрашувдан сўнг Қозоғистон биринчи президенти музейига ташриф буюрган. Давлат раҳбари музей билан танишиб, Фахрий меҳмонлар китобида қайд ёзиб қолдирган.
Эслатиб ўтамиз, Шавкат Мирзиёев 5 декабрь куни Қосим-Жўмарт Тўқаевнинг таклифига биноан Қозоғистонга жўнаб кетганди. Уни Нур-Султонда Қозоғистон президенти кутиб олди.
Ташриф чоғида Оқ ўрдада Шавкат Мирзиёев ва Қосим-Жўмарт Тўқаев тор доирада музокаралар ўтказди ва икки томонлама ҳамкорликнинг муҳим вазифаларини белгилаб олди. Шунингдек, Шавкат Мирзиёев Нур-Султондаги «Ватан ҳимоячилари» монументига гул қўйди ва Ўзбекистон ва Қозоғистон ўртасида иттифоқчилик муносабатлари тўғрисидаги декларация имзоланди.
Изоҳ (0)