Бош прокуратуранинг иш вақтида вафот этган 33 ёшли ходими С.Р.нинг оиласига нафақа пули тўлаб берилмагани бўйича суд иши қайта кўриб чиқилади. Бу ҳақда Тошкент шаҳар суди матбуот хизмати хабар берди.
Фуқаролик ишлари бўйича Миробод туманлараро судининг 17 сентябрдаги ҳал қилув қарори билан даъвогар А.Р.нинг жавобгар Бош прокуратурага нисбатан фарзанди вафоти муносабати билан иш жойидан нафақа пули ҳамда маънавий зарар ундириш тўғрисидаги даъво ва қўшимча даъво аризалари рад қилинганди. Даъвогар мазкур ҳал қилув қароридан норози бўлиб, судга апелляция шикояти киритган. Ушбу апелляция шикояти 2021 йил 12 ноябрь куни Тошкент шаҳар суди фуқаролик ишлари бўйича судлов ҳайъатида кўриш бошланган.
Тошкент шаҳар суди матбуот хизмати хабарида қайд этилишича, ишни кўриш жараёнида ИИВ тиббиёт бошқармаси, Бош прокуратурадан олти нафар ходим ва ўша куни бўлимда иш ўрганишда бўлган Ҳарбий прокуратура аппарати ходими, Тошкент шаҳар Бандлик бош бошқармаси Давлат меҳнат ҳуқуқ инспекцияси, Соғлиқни сақлаш вазирлиги ТХКМРМKTK, Шайхонтоҳур туман прокуратураси, Миробод тумани прокуратураси, РСТЕИАМ Тошкент шаҳар филиали Морфология бўлими Сергели пунктининг давлат суд тиббий экспертизасидан, Тошкент шаҳар Бандлик бош бошқармаси, Давлат меҳнат ҳуқуқ инспекцияси, Касаба уюшмалари федерацияси, Миробод тумани Бюджетдан ташқари Пенсия жамғармаси, Тошкент шаҳар тез тиббий ёрдам станциялари вакилларнинг кўрсатмалари эшитилиб, ёзма маълумотлар ва тегишли ҳужжатлар олинган.
Ишни кўришда марҳум С.Р.нинг хотини Н.Р. ишга жалб қилинмагани, унинг ҳуқуқ ва мажбуриятлари тушунтирилмаганини, биринчи инстанция судида кўрилиши мобайнида даъвогар А.Р.да унинг манфаатларида судга мурожаат қилиш ва иштирок этиш ҳуқуқини берувчи ишончнома бўлмагани аниқланган.
Шунингдек, А.Р.нинг ўзи боқувчисини йўқотганлик учун нафақа олиш ҳуқуқига эга шахслар доирасига кирмаслиги сабабли 6 декабрь куни судлов ҳайъатининг ажрими билан биринчи инстанция судининг ҳал қилув қарори бекор қилиниб, иш янгидан кўриш учун биринчи инстанция судига юборилган.
Изоҳ (0)