Маҳмуд Муродовнинг навбатдаги жанги санаси ва рақиби номи маълум бўлди

Ўзбекистонлик яккакурашчи Маҳмуд Муродов (25-7) UFC’даги бешинчи жангини 2022 йилнинг 26 февралида (Тошкент вақти билан 27 февраль) ўтказади. Бу ҳақда спортчи ўзининг Instagram саҳифаси орқали маълум қилди.

Ўзбекистонлик яккакурашчи АҚШнинг Лас-Вегас шаҳрида ўтказиладиган UFC мусобақасида кимга қарши жанг қилиши расман маълум қилинмаган. Хабарларга кўра, Муродовга латвиялик Миша Циркунов (15-7) рақиб бўлади.

Мазкур UFC оқшомининг асосий жанги енгил вазн тоифаси вакиллари Ислом Махачев (21-1) ва Бенеил Дариуш (21-1-4) ўртасида кечади.

Муродов охирги жангини 2021 йилнинг август ойида Жералд Миршертга (33-14) қарши ўтказиб, UFC’даги илк мағлубиятини қабул қилиб олганди.

Маълумот учун, Муродов UFC’даги дебют жангида италиялик Алессио ди Кирикони (13-5) очколар ҳисобига кўра, иккинчи жангида Тревор Смит (15-10), учинчисида эса Эндю Санчесни (12-6) нокаут эвазига мағлубиятга учратганди.

Миша Циркунов охирги икки жангини 2021 йилда ўтказиб, уларда Райан Спенн ва Кшиштоф Ёткога мағлуб бўлган.