Шавкат Мирзиёев: «Ўзини яхши кўрсатган ҳоким ёрдамчилари ва республика вакилларига ипотека асосида квартира олишда 50 фоизгача субсидия ажратилади»

Ўзини яхши кўрсатган ҳоким ёрдамчилари ва республика вакиллари мукофотланади, йил натижалари бўйича эса «Янги Ўзбекистон ислоҳотчиси» кўкрак нишонига тавсия қилинади. Уларга ипотека асосида квартира олишда 50 фоизгача субсидия ажратилади. Бу ҳақда президент Шавкат Мирзиёев раислигида ўтказилаётган ипотека ва қурилиш материаллари мавзусидаги видеоселектор йиғилишида айтиб ўтилди, дея хабар бермоқда «Дарё» мухбири.

Давлат раҳбари ҳоким ёрдамчиси фаолиятини ташкил этиш бўйича имзолаган фармон асосида ҳоким ёрдамчилари 1 январдан барча маҳаллаларда (9 минг 251 та) фаолиятини бошлашини қайд этди. Ҳоким ёрдамчилари фаолиятини самарали ташкил этиш мақсадида бир йил давомида доимий фаолият юритадиган «Маҳаллабай ишлаш штаби» тузилади.

Шунингдек, ҳар бир туман ва шаҳарга вазирлик, марказий идоралар ва банклардан 1-3 нафардан масъул ходим бириктирилади, бунда маҳаллалар сони 50 тагача бўлса – 1 нафар, 100 тагача – 2 нафар, 100 тадан ортиқ бўлса – 3 нафар, жами 342 нафар.

Улар 1 йилга туманга хизмат сафарига юборилади ва иш жойи, ойлик иш ҳақи сақлаб қолинади. Ушбу вакиллар:

• ҳоким ёрдамчиларини ўргатади ва улар билан бирга, маҳалланинг ТЕОсини ишлаб чиқади;
• ҳар куни биттадан маҳаллани айланиб, камида 10 та хонадонга киради, одамлар билан учрашиб, президент сиёсатини тушунтиради, мавжуд муаммоларни жойида ҳал қилади;
• томорқадан самарали фойдаланиш, аҳолига парранда, қўй-эчки, уруғ ва кўчатлар олиб бериш ишларини ташкил этади;
• ҳал қилиниши лозим бўлган муаммолар бўйича туман ва вилоят ҳокими, маҳаллий кенгашлар, вазирликлар олдига аниқ масалаларни қўяди.

«Бош вазир қабулхоналари ва Тадбиркорликни ривожлантириш агентлиги негизида Маҳаллабай ишлаш ва тадбиркорликни ривожлантириш агентлиги ҳамда туман (шаҳар)ларда Маҳаллабай ишлаш ва тадбиркорликни ривожлантириш марказлари ташкил этилади», – деди президент.

Ушбу тизимни самарали йўлга қўйишга барча ҳудуд ва сектор раҳбарлари масъуллиги айтилди.