Тошкент вилоятининг Чиноз тумани ҳокими Ботир Алимбеков 12 ноябрь куни Чиноз туманида 2022 йил учун «Чиноз ҳаёти» ижтимоий-сиёсий газетаси обунасини уюшқоқлик билан ташкил этиш тўғрисида фармойиш имзолади.
Фармойишда Чиноз туманида аҳоли, айниқса, раҳбар ва ходимларнинг иқтисодий, сиёсий ва соғлом мафкуравий ахборотга бўлган талабини қондириш зарурлиги айтилган. «Чиноз ҳаёти» газетасига обунани ташкил этиш мақсадида ҳокимнинг биринчи ўринбосари бошчилигида ишчи гуруҳ ташкил этилиши белгиланган. Унинг таркибида «Чиноз ҳаёти» газетаси бош муҳаррири, халқ таълими, молия бўлими бошлиқлари ҳамда тиббиёт бирлашмаси раҳбари ҳам бўлган.
Улар 3 кун муддатда тумандаги барча корхона, муассаса ва ташкилот раҳбарлари билан маслаҳатлашиб, 2022 йил учун чораларини кўриши лозимлиги қайд этилган. Тавсия этилган бир йиллик обуна нусхаси сони 5498 тани ташкил этган.
2 декабрь куни Адлия вазирлиги Чиноз туман адлия бўлими газетага мажбурий обуна ноқонуний деб топиб, 15 ноябрь куни ҳокимликка мазкур фармойишни бекор қилиш юзасидан тақдимнома киритганини маълум қилди. Тақдимномага асосан мазкур фармойиш Чиноз туман ҳокимининг 30 ноябрдаги қарори билан бекор қилинган.
Эслатиб ўтамиз, 22 июнда маҳаллий давлат ҳокимияти органлари фаолиятига «E-qaror» электрон тизимини жорий этиш бўйича ҳукумат қарори қабул қилинган. Мазкур ҳужжат маҳаллий давлат ҳокимияти органларининг қарорлари ва фармойишлари ишлаб чиқилишдан то эълон қилингунгача бўлган барча жараёнларнинг фақат «E-qaror» электрон тизими орқали амалга оширилишини назарда тутади.
Изоҳ (0)