Ўзбекистонда автомототранспорт воситаларига берилган рўйхатдан ўтказиш давлат рақами белгиси орқали «автомобиль тарихи»га оид маълумотларни автоматик тарзда олиш хизмати жорий этилмоқда. Бу ҳақда Давлат хизматлари агентлиги хабар қилди.
Маълум қилинишича, Норматив-ҳуқуқий ҳужжатлар лойиҳалари муҳокамаси порталида Давлат хизматлари агентлиги томонидан ишлаб чиқилган «Автомобиль тарихи» маълумотларини тақдим этиш бўйича давлат хизматини кўрсатишнинг маъмурий регламентини тасдиқлаш тўғрисида»ги ҳукумат қарори лойиҳаси эълон қилинган. Лойиҳага кўра, янги тизим орқали қуйидаги маълумотларни олиш мумкин бўлади:
- автотранспорт воситасининг агрегат маълумотлари, тахминий юрган масофаси;
- автотранспорт воситасининг гаровда эканлиги ёки унга нисбатан тақиқ мавжуд/мавжуд эмаслиги тўғрисидаги;
- фуқаролик-ҳуқуқий шартномалар (ишончнома, ижара, ҳадя, олди-сотди шартномаси, мерос ва бошқалар) тузилгани;
- йўл-транспорт ҳодисаси содир этилгани;
- автотранспорт воситасига йўловчи ташиш бўйича лицензия варақаси олингани (олинмагани) ҳақидаги маълумотлар;
- божхона расмийлаштирувидан ўтгани тўғрисидаги ва бошқа маълумотлар.
Шунингдек, хизмат ихтиёрий равишда, муайян ҳақ эвазига (БҲМнинг 20 фоизи) кўрсатилади. Ушбу хизматдан келиб тушган маблағлар «Автомобиль тарихи» маълумотларини ягона базага бирлаштириб бориш учун махсус дастур яратиш, уни юритиб бориш, маълумотларни рақамлаштириш ва актуал ҳолатда сақлаш, техник хизмат кўрсатиш кабиларга йўналтирилади.
«Аҳолига қулайликлар яратиш мақсадида, хизмат нафақат Давлат хизматлари маркази ёки ЯИДХП орқали, балки хусусий веб-сайтлар, онлайн платформалар орқали кўрсатилади. Иккиламчи бозорда автомобиль савдосида фирибгарлик ҳолатларининг олдини олишда ёрдам беради», дейилади хабарда.
Мавзуга доир:
Изоҳ (0)