WSJ: AQSh Yevropadagi harbiy o‘quvlarini cheklashi yoki Rossiyaga qarshi sanksiyalar qo‘llashi mumkin

Jo Bayden administratsiyasi “Moskva bilan qarama-qarshilik xavfini kamaytirish” bo‘yicha bir nechta variantlarni ko‘rib chiqmoqda: Ukrainani harbiy qo‘llab-quvvatlashni oshirishdan tortib diplomatiyani faollashtirishgacha. Bu haqda The Wall Street Journal’ga tayanib, “Kommersant” xabar berdi. Gazeta ma’lumotlariga ko‘ra, variantlardan birida AQShning Yevropadagi harbiy o‘quvlarini cheklash va Ukrainaga harbiy yordam ko‘rsatishni to‘xtatish ham bor.

AQSh ushbu variantlarni NATOga a’zo mamlakatlarning tashqi ishlar vazirlari uchrashuvida muhokama qilish niyatida. AQSh davlat kotibining Yevropa va Yevrosiyo bo‘yicha yordamchisi Karen Donfridning ma’lum qilishicha, Vashington uchrashuvda muammoni hal etishning ehtimoliy variantlari haqida gapiradi. U Vashingtonda qanday takliflar borligiga aniqlik kiritmagan. WSJ ma’lumotlariga ko‘ra, uchrashuvdan oldin Joy Bayden administratsiyasi mavjud variantlarni muhokama qilgan.

WSJ versiyasiga ko‘ra, AQSh NATOga quyidagilarni taklif qila oladi:

• Ukraina mudofaa imkoniyatlarini kuchaytirish, havo hujumidan mudofaa vositalarini yetkazib berishni va boshqa harbiy yordamlarni ko‘rsatishni oshirish, shuningdek, Rossiyaga qarshi iqtisodiy sanksiyalarni qo‘llash;
• “Rossiyaliklarning fikricha, provokatsion xarakterga ega” deyilgan AQShning Yevropadagi harbiy o‘quvlarini cheklash va Ukrainaga harbiy yordam ko‘rsatishni to‘xtatish.

AQSh prezidenti Jo Bayden avvalroq Rossiya va Ukraina prezidentlari Vladimir Putin hamda Vladimir Zelenskiy bilan “katta ehtimolga ko‘ra” muzokaralar o‘tkazishini ma’lum qilgan. Zelenskiy esa undan oldinroq Rossiya qo‘shinlarining Ukraina yaqinida joylashtirilishi bilan bog‘liq vaziyat bahordagi holatchalik emasligini aytgandi. Uning ta’kidlashicha, harbiylar soni yozdagi — Donbassda o‘t ochishga qo‘yilgan taqiq vaqti bilan taqqoslaganda oshgan. Putin bo‘lsa “g‘arbdagi sheriklar” Ukrainaga “zamonaviy uchish qurollarini yetkazib berish, provokatsion harbiy manyovrlarni o‘tkazish bilan” Donbassdagi vaziyatni keskinlashtirayotganini ma’lum qilgan.

WSJ’ning qayd etishicha, Jo Bayden administratsiyasidagi muhokama Ukraina prezidenti Vladimir Zelenskiyning mamlakatda davlat to‘ntarishiga tayyorgarlik ketayotgani borasidagi bayonoti fonida bo‘lib o‘tgan. Go‘yoki ularga Rossiya va Ukraina fuqarolari xizmat ko‘rsatgan hamda mamlakatning eng badavlat insonlaridan biri Rinat Axmetov tilga olingan.