Ўзбекистонда амалдаги рецептсиз бериладиган дори воситалари рўйхати бекор қилиниб, уни янгилаш бўйича буйруқ лойиҳаси ишлаб чиқилди. Унга мувофиқ, рецептсиз бериладиган препаратлар рўйхати кенгайтирилмоқда, деб хабар беради ССВ матбуот хизмати.
Маълум қилинишича, 2021 йилнинг июль ойидан Соғлиқни сақлаш вазирлиги буйруғи асосида рецептсиз бериладиган дори воситалари рўйхати кескин камайтирилгач, монопрепаратлар позицияси 105 тага, мажмуавий препаратлар рўйхати эса 118 тага қисқариб кетган.
«Оқибатда рецептсиз ҳам берилиши мумкин бўлган дориларни харид қилиш учун бемор йўл босиб, вақт йўқотиб, навбат кутиб шифокор қабулига киришга мажбур бўлмоқда. Борди-ю, қўшимча текширувлар талаб этилса, яна навбат асосида тиббий хулосани олгач, врач ҳузурига такрор кириб рецепт ёздириб олишига тўғри келяпти», — дейилади хабарда.
Қайд этилишича, бундай оворагарчилик ва бюрократик тўсиқлар аҳолининг тиббиёт тизимига нисбатан ишончи камайишига, қолаверса, фармацевтика компанияларининг ҳақли эътирозларига сабаб бўлмоқда.
«Негаки, қонунчилик талабларига кўра, рецепт асосида бериладиган препаратларни тарғибот қилиш тақиқланган. Бу эса аҳолининг зарур дори воситалари ҳақидаги маълумотлардан хабардорлигини чекламоқда. Масалан, темпалгин, мукомилт, дексафлю, табекс каби қатор препаратларни чет эл дорихоналаридан ҳеч қандай чекловларсиз харид қилса бўлади. Бизда эса бунинг учун рецепт сўраляпти», — дея таъкидланади хабарда.
Соғлиқни сақлаш вазирлиги ана шу муаммоларга ечим топиш учун келиб тушаётган эътироз ва мурожаатлар, қолаверса, халқаро амалиёт ҳамда хорижий тажрибани чуқур ўрганган ҳолда, Монополияга қарши курашиш қўмитаси билан биргаликда амалда бўлган рецептсиз бериладиган дори воситалари рўйхатини бекор қилиб, уни янгилаш бўйича буйруқ лойиҳасини ишлаб чиққан. Янги буйруқ яқин кунларда «Regulation.gov.uz» порталида муҳокамага қўйилиши ва Адлия вазирлиги томонидан рўйхатга олингач, кучга кириши айтилмоқда.
Аввалроқ Ўзбекистонда тиббий буюмларни ишлаб чиқариш ва тайёрлаш учун лицензия талаб қилинмаслиги, Ўзбекистонда орқа мия мушак атрофияси орфан касалликлари рўйхатига киритилгани тўғрисида хабар берилганди.
Изоҳ (0)