Қироллик оиласи аъзолари The Princes and the Press («Шаҳзодалар ва матбуот») фильмининг биринчи эпизоди чиққандан кейин BBC’нинг келажакдаги лойиҳаларини бойкот қилиш билан таҳдид қилди. Бу ҳақда Daily Mail хабар берди.
Букингем саройи, шаҳзода Уильям ва шаҳзода Чарльзнинг қўшма баёнотида айтилишича, BBC фильми «шаҳзода Гарри ва Уильям ўртасидаги келишмовчилик ҳақида ошириб юборилган ва асоссиз даъволарни ҳақиқийдек тақдим этади».
Хусусан, суратга олиш жараёнида иштирок этганлардан бири журналист Омид Скоби «Меганнинг оғзи» лақабини олган. Фильмда у қироллик оиласи аъзоларини Сассекс герцоги ва герцогинясига қарши биргаликда ҳаракат қилишда айблаган.
BBC’нинг кейинги лойиҳаларини бойкот қилиш таҳдиди қироллик оиласи вакилларига фильм намойиш этилишидан олдин унинг мазмуни билан танишиш ва ўз нуқтаи назарини билдириш имконияти берилмагани билан боғлиқ.
The Mirror нашрининг ёзишича, корпорация қоидаларига кўра, материаллар билан фақат суратга олишнинг бевосита иштирокчилари танишиши мумкин, фильмдаги нутқ эса оммавий ахборот воситалари вакиллари номидан бўлгани учун қоидалар бузилмаган.
22 ноябрь, душанба куни чиқарилган фильмнинг биринчи эпизоди шаҳзода Уильям ва шаҳзода Гаррининг 2012 йилдан 2018 йилгача (Гарри Меган Маркл билан турмуш қургунча) бўлган муносабатларини оммавий ахборот воситаларида ёритишга қаратилган. 2018—2021 йиллардаги воқеаларни қамраб оладиган иккинчи эпизод кейинги ҳафтада эълон қилиниши керак.
Шазода Гарри ва Меган Маркл 2020 йил январь ойида қироллик унвонларидан воз кечган. Улар ишлаш ва бизнес қилиш учун АҚШга кўчиб ўтган. Шаҳзода Гарри ва Меган Марклнинг Букингем саройи билан муносабатлари 2021 йил март ойида — уларнинг америкалик телебошловчи Опра Уинфрига берган шов-шувли интервьюсидан сўнг ёмонлашди, унда Сассекс герцогиняси қироллик оиласининг айрим аъзоларидаги ирқчилик кайфияти ҳақида гапирган.
Изоҳ (0)