Истанбул ва Анқара аҳолиси мамлакатдаги ҳукмрон Адолат ва тараққиёт партияси ҳамда унинг етакчиси президент Ражаб Тоййиб Эрдўғонга қарши норозилик намойиши ўтказди. Бунга лиранинг тарихий минимумга қадар тушиб кетиши сабаб бўлган: 1 АҚШ долларининг курси 13,4 лирага етган — бир сутка давомида курс 15 фоизга тушиб кетган, деб хабар беради «Коммерсантъ». Норозилик намойишчилари ҳукуматнинг истеъфосини талаб қилган.
Истанбулдаги намойишчилар Шишли тумани кўчалари бўйича юрган. Полиция Тақсим майдонини ёпиб қўйган: 2013 йили у ерда ҳукуматга қарши тартибсизликларга айланиб кетган дарахтларнинг кесилишига қарши намойишлар ўтказилганди.
Мамлакат жанубида жойлашган Диёрбакир шаҳридаги дўконларнинг эгалари норозилик намойиши рамзи сифатида сохта долларни ёқиб юборган. Туркия аҳолиси, шунингдек, ижтимоий тармоқлар орқали ўз норозилигини билдирмоқда: Reuters агентлиги маълумотларига кўра, Туркияда оммалашаётган Twitter’да «биз чўкяпмиз» ва «ҳукумат истеъфога чиқсин» каби иборалар кенг тарқалган.
Маълумот учун, лира курси 2016 йил ёзидан бошлаб, мамлакатда ҳарбийлар томонидан давлат тўнтаришига уриниш амалга оширилганидан бери пастламоқда. 2017 йил бошида Bloomberg агентлиги лирани энг ёмон валюта тан олган эди. Эрдўғон бунда «қўли долларга тўла террорчилар»ни айблаган эди. 2018 йилда Эрдўғон туркларни доллардаги жамғармаларини лирага ўтказишга чақирганди. 2021 йилнинг мартида эса Эрдўғон Туркия Марказий банки раҳбарини ишдан бўшатгач, турк лираси қадрсизланиб кетган эди.
Изоҳ (0)