«Тошкент трактор заводи» ўрнида сайилгоҳ қурилади

Чирчиқ шаҳрида қишлоқ хўжалиги машинасозлик кластери ташкил қилиниб, «Тошкент трактор заводи» ҳам ўша ҳудудга кўчирилади. Бу ҳақда «Норма» хабар қилмоқда.

Қайд этилишича, «Тошкент қишлоқ хўжалиги техника заводи», «Агрегат заводи», «Технолог» акциядорлик жамиятлари, «Технолог-Стан», «Агросаноатмашинвест» корхоналари ишлаб чиқариш қувватларининг бир қисмини Чирчиқ шаҳридаги «Чирчиқ қишлоқ хўжалиги техникаси заводи» ҳудудига кўчириш ҳамда корхоналарни қайта ташкил этиш масалалари уларнинг акциядорлари умумий йиғилиши томонидан дастлабки тарзда кўриб чиқилгани ва тегишли қарорлар қабул қилингани маълумот учун қабул қилинади. Шунингдек, уларнинг негизида қишлоқ хўжалиги машинасозлик кластери ташкил этилади.

Бундан ташқари, «Тошкент трактор заводи» («ТТЗ» МЧЖ) ташкил этилади. «Чирчиқ қишлоқ хўжалиги техникаси заводи» ҳамда юқорида айтиб ўтилган корхоналарнинг устав капиталларидаги давлат улушлари номинал қийматда ушбу корхонага ўтказилади. «ТТЗ»даги давлат улуши «Ўзавтосаноат» АЖга 2 йил муддатга ишончли бошқарувга берилади.

Корхоналарга тегишли бўшаётган ер майдонлари Давлат активларини бошқариш агентлиги томонидан онлайн-аукцион савдолари орқали сотилиши белгиланмоқда. Бунда агентлик ва Тошкент шаҳар ҳокимлиги бир ой муддатда «Тошкент қишлоқ хўжалиги техникаси заводи» (илгариги ТТЗ)нинг бўшаётган ер майдонларидан унумли фойдаланиш, жумладан, унинг бир қисмида аҳоли сайил қилишига мўлжалланган яшил жамоат паркини яратиш бўйича ҳукуматга таклиф киритади. Уларни сотишдан тушган маблағлар «ТТЗ» МЧЖнинг алоҳида ғазначилик ҳисобрақамига ўтказилади.

Молия вазирлиги томонидан «ТТЗ» МЧЖга корхоналарни «Чирчиқ қишлоқ хўжалиги техникаси заводи» ҳудудига кўчириш, акцияларнинг қайтариб сотиб олинишини талаб қилган акциядорлардан уларга тегишли акцияларни сотиб олиш (заруратга кўра) билан боғлиқ бўлган харажатларни молиялаштириш учун Марказий банкнинг асосий ставкасида 100 миллиард сўм миқдорида ссуда маблағлари ажратилади. Ушбу ссудани сўндириш муддати 1 йил ҳисобланади. Ссуда кейинчалик бўшаётган активларни электрон онлайн-аукцион савдоларида сотишдан тушадиган маблағлар ҳисобидан қопланади.

2022 йил 1 январдан бошлаб маҳаллийлаштириш даражаси 25 фоиздан кам бўлмаган маҳаллий ишлаб чиқарувчилар ёки уларнинг ваколатли дилерлик ташкилотлари томонидан харидорларга етказиб бериладиган қишлоқ хўжалиги техникалари учун қуйидаги субсидиялардан бир вақтда фойдаланишга рухсат берилади:

• Қишлоқ хўжалиги техникаси қийматининг 15 фоизи миқдорида ажратиладиган субсидия. Ушбу маблағлар биринчи навбатда қишлоқ хўжалиги техникаларини сотиб олиш учун жалб қилинган кредит ёки лизинг бўйича қарздорликни сўндиришга йўналтирилади.
• Кредит ёки лизинг шартлари асосида қишлоқ хўжалиги техникалари харид қилинганда фоиз харажатлари субсидияси. Бунда фоиз харажатларининг 10 фоиз пунктидан ортиқ қисми Молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси томонидан давлат бюджети маблағлари ҳисобидан қоплаб берилади.
• «Тошкент қишлоқ хўжалиги техникаси заводи» ҳамда унинг ҳудудида ижара шартномалари асосида жойлашган, Чирчиқ шаҳрига кўчирилаётган корхоналар томонидан етказиб бериладиган қишлоқ хўжалиги техникаларига нисбатан субсидиялар ажратилиши истисно тариқасида 2023 йил 31 декабрга қадар татбиқ этилади.