ДХХ Сурхондарёда 115 килодан ортиқ гиёҳванд моддаларнинг ноқонуний муомаласига чек қўйди

Давлат хавфсизлик хизматининг Сурхондарё вилояти бўйича бошқармаси ходимлари томонидан Термиз шаҳрида ўтказилган тезкор-қидирув тадбирлари натижасида катта миқдордаги гиёҳванд моддалар мусодара қилинди. Бу ҳақда идора матбуот хизмати «Дарё»га маълум қилди.

Хусусан, 39 ёшли фуқаро 28,89 килограмм опий ҳамда 2 килограмм гашиш моддаларини, шунингдек, бошқа бир ҳолатда эса муқаддам гиёҳванд моддалар билан боғлиқ жиноят содир этгани учун судланган ака-ука (1962 ва 1970 йилларда туғилган) 9,16 килограмм опий ва 446 грамм героин моддаларини келгусида сотиш мақсадида қабул қилиб олган вақтида ашёвий далиллар билан ушланган.

Таъкидланишича, ҳар икки ҳолатда ҳам гиёҳванд моддалар афғонистонлик наркокурьерлар томонидан мамлакат ҳудудига олиб ўтилган.

Сариосиёда кузатилган ҳолатда тожикистонлик наркокурьерлар томонидан туманнинг тоғли ҳудудига ўтказилиб, хуфия жойга беркитиб кетилган 28,5 килограмм опий моддасини қабул қилиб олган 31 ёшли маҳаллий фуқаро ушланган.

ДХХ ходимларининг Сурхондарё вилояти божхона бошқармаси билан ҳамкорликда Термиз шаҳрида ўтказган тезкор тадбирида эса 52, 51 ва 31 ёшли уч нафар фуқаро 481 грамм опий моддасини 9400 АҚШ долларига сотган вақтларида қўлга олинган.

ДХХ, ИИВ ҳамда Давлат божхона қўмитасининг ҳудудий бошқармалари ходимлари ҳамкорлигида ўтказилган тезкор тадбирда Термиз тумани «Мангузар» ЙПХ масканидан ўтиб, вилоят маркази томон ҳаракатланаётган Spark автомашинаси тўхтатилган.

Автомашина кўздан кечирилганда, унда йўловчи сифатида кетаётган, Тожикистон фуқароси (Душанбе шаҳрида истиқомат қилувчи, 34 ёшли) ва деновлик фуқарога (Денов туманида яшовчи 36 ёшли) тегишли юк сумкаларида Афғонистондан контрабанда йўли билан олиб келинган 45,9 килограмм гашиш борлиги аниқланиб, процессуал тартибда расмийлаштириб олинган.

Ўтказилган тезкор тадбирлар натижасида жами 67,43 килограмм опий, 47,9 килограмм гашиш ҳамда 446 грамм героин гиёҳванд моддалари мусодара қилинган.

Ҳозирда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Аввалроқ Тошкент вилоятида 4 килограмм гиёҳванд модда сақлаётган эркак аниқлангани, ИИБ ходимига ишни ёпиш учун пора берган ўғли эса қўлга олингани, ДХХ Жиззах, Андижон ва Тошкент вилоятларида гиёҳванд моддалар савдоси билан шуғулланган бир неча хориж фуқароларини ушлагани тўғрисида хабар берилганди.