Chirchiq shahrida qishloq xo‘jaligi mashinasozlik klasteri tashkil qilinib, “Toshkent traktor zavodi” ham o‘sha hududga ko‘chiriladi. Bu haqda “Norma” xabar qilmoqda.
Qayd etilishicha, “Toshkent qishloq xo‘jaligi texnika zavodi”, “Agregat zavodi”, “Texnolog” aksiyadorlik jamiyatlari, “Texnolog-Stan”, “Agrosanoatmashinvest” korxonalari ishlab chiqarish quvvatlarining bir qismini Chirchiq shahridagi “Chirchiq qishloq xo‘jaligi texnikasi zavodi” hududiga ko‘chirish hamda korxonalarni qayta tashkil etish masalalari ularning aksiyadorlari umumiy yig‘ilishi tomonidan dastlabki tarzda ko‘rib chiqilgani va tegishli qarorlar qabul qilingani ma’lumot uchun qabul qilinadi. Shuningdek, ularning negizida qishloq xo‘jaligi mashinasozlik klasteri tashkil etiladi.
Bundan tashqari, “Toshkent traktor zavodi” (“TTZ” MChJ) tashkil etiladi. “Chirchiq qishloq xo‘jaligi texnikasi zavodi” hamda yuqorida aytib o‘tilgan korxonalarning ustav kapitallaridagi davlat ulushlari nominal qiymatda ushbu korxonaga o‘tkaziladi. “TTZ”dagi davlat ulushi “O‘zavtosanoat” AJga 2 yil muddatga ishonchli boshqaruvga beriladi.
Korxonalarga tegishli bo‘shayotgan yer maydonlari Davlat aktivlarini boshqarish agentligi tomonidan onlayn-auksion savdolari orqali sotilishi belgilanmoqda. Bunda agentlik va Toshkent shahar hokimligi bir oy muddatda “Toshkent qishloq xo‘jaligi texnikasi zavodi” (ilgarigi TTZ)ning bo‘shayotgan yer maydonlaridan unumli foydalanish, jumladan, uning bir qismida aholi sayil qilishiga mo‘ljallangan yashil jamoat parkini yaratish bo‘yicha hukumatga taklif kiritadi. Ularni sotishdan tushgan mablag‘lar “TTZ” MChJning alohida g‘aznachilik hisobraqamiga o‘tkaziladi.
Moliya vazirligi tomonidan “TTZ” MChJga korxonalarni “Chirchiq qishloq xo‘jaligi texnikasi zavodi” hududiga ko‘chirish, aksiyalarning qaytarib sotib olinishini talab qilgan aksiyadorlardan ularga tegishli aksiyalarni sotib olish (zaruratga ko‘ra) bilan bog‘liq bo‘lgan xarajatlarni moliyalashtirish uchun Markaziy bankning asosiy stavkasida 100 milliard so‘m miqdorida ssuda mablag‘lari ajratiladi. Ushbu ssudani so‘ndirish muddati 1 yil hisoblanadi. Ssuda keyinchalik bo‘shayotgan aktivlarni elektron onlayn-auksion savdolarida sotishdan tushadigan mablag‘lar hisobidan qoplanadi.
2022-yil 1-yanvardan boshlab mahalliylashtirish darajasi 25 foizdan kam bo‘lmagan mahalliy ishlab chiqaruvchilar yoki ularning vakolatli dilerlik tashkilotlari tomonidan xaridorlarga yetkazib beriladigan qishloq xo‘jaligi texnikalari uchun quyidagi subsidiyalardan bir vaqtda foydalanishga ruxsat beriladi:
- Qishloq xo‘jaligi texnikasi qiymatining 15 foizi miqdorida ajratiladigan subsidiya. Ushbu mablag‘lar birinchi navbatda qishloq xo‘jaligi texnikalarini sotib olish uchun jalb qilingan kredit yoki lizing bo‘yicha qarzdorlikni so‘ndirishga yo‘naltiriladi.
- Kredit yoki lizing shartlari asosida qishloq xo‘jaligi texnikalari xarid qilinganda foiz xarajatlari subsidiyasi. Bunda foiz xarajatlarining 10 foiz punktidan ortiq qismi Moliya vazirligi huzuridagi Qishloq xo‘jaligini davlat tomonidan qo‘llab-quvvatlash jamg‘armasi tomonidan davlat byudjeti mablag‘lari hisobidan qoplab beriladi.
- “Toshkent qishloq xo‘jaligi texnikasi zavodi” hamda uning hududida ijara shartnomalari asosida joylashgan, Chirchiq shahriga ko‘chirilayotgan korxonalar tomonidan yetkazib beriladigan qishloq xo‘jaligi texnikalariga nisbatan subsidiyalar ajratilishi istisno tariqasida 2023-yil 31-dekabrga qadar tatbiq etiladi.
Izoh (0)