Туркманистон президент Гурбангули Бердимуҳамедов 18 ноябрь куни Жанубий Корея пойтахти Сеулда бўлиб ўтган Шимолий Иқтисодий ҳамкорлик бўйича Халқаро форумда видеоалоқа орқали иштирок этди. Бу ҳақда «Хроника Туркменистана» хабар берди.
«Туркманистон Форумга Евросиёдаги иқтисодий ҳамкорликнинг стратегик векторларини муҳокама қилиш ва ривожлантириш учун муҳим халқаро платформа, шунингдек, Корея билан икки ва кўп томонлама форматдаги ўзаро манфаатли иқтисодий шерикликнинг муваффақиятли давоми сифатида қарайди», — деди Бердимуҳамедов.
Гурбангули Бердимуҳамедов пандемия мавзусига тўхталар экан, «дунё ҳамжамияти, афсуски, унга ўз вақтида самарали қарши тура олмади», деб куйинди. У «жаҳондаги барча давлатларнинг интеллектуал, моддий, молиявий ва бошқа ресурсларини бирлаштириш орқалигина» пандемияни енгиш мумкинлигини қўшимча қилди.
Туркманистон раҳбари «коронавирус муаммосини сиёсатдан бутунлай олиб ташлаш» ва «пандемиядан давлатлараро муносабатларда таъсир ўтказиш воситаси сифатида фойдаланишни тўхтатиш»га чақирди.
Бердимуҳамедов БМТ Бош Ассамблеясининг 76-сессиясида – ЖССТ раҳбарлигида коронавирус этиологиясини ўрганиш, COVID-19 келтириб чиқарадиган касалликларни даволаш ва олдини олиш соҳасида мақсадли ишларни олиб бориш бўйича билдирган ўз ташаббусларини эслатиб ўтди.
Маълумот учун, Туркманистон ўз ҳудудида коронавирус инфекцияси мавжудлигини тан олмаганди. Дунёда фақат иккита давлат — Туркманистон ва Шимолий Корея ҳукуматининг расмий маълумотларига кўра, бу мамлакатлар глобал пандемиядан зарар кўрмаган.
Шунингдек, Туркманистон Жанубий Корея билан соғлиқни сақлаш, «яшил» ривожланиш ва озиқ-овқат хавфсизлиги каби соҳалардаги самарали ҳамкорликни юксак қадрлаши таъкидланди.
«Гуманитар соҳа – биргаликдаги саъй-ҳаракатларни талаб қиладиган майдон. Бу йўналишда катта салоҳиятга эга Туркманистон ва Корея яқин келажакда янги қўшма лойиҳаларни амалга оширишни бошлаши мумкин бўлади, бу эса ‘Янги Шимол сиёсати’ни амалга оширишга салмоқли ҳисса қўшади», — деди давлат раҳбари.
Гурбангули Бердимуҳамедов 2020 йилги форумдаги нутқида жанубий кореялик ишбилармонларга мурожаат қилиб, уларни «Туркманистон бозорига фаолроқ киришга» чорлаб, уларга қулай меҳнат шароитларини яратиш ва максимал даражада ёрдам беришни ваъда қилган эди.
18 ноябрь куни Туркманистон ташқи ишлар вазири Рашид Мередов ва унинг кореялик ҳамкасби Чон Ий Ён ўртасида телефон суҳбати бўлиб ўтди. Томонлар сиёсий, савдо-иқтисодий ва маданий-гуманитар соҳалардаги икки томонлама ҳамкорликни муҳокама қилди, дея хабар беради Туркманистон ТИВ.
Вазирлар, шунингдек, 30 ноябрга белгиланган 14-Марказий Осиё—Корея ҳамкорлик форуми кун тартибини ҳам муҳокама қилган.
Эслатиб ўтамиз, ЖССТ Туркманистоннинг мамлакатда коронавирусга чалиниш ҳолатлари йўқлиги ҳақидаги даъвосини шубҳа остига қўйган. «Вирус пандемия сифатида қарийб икки йилдан бери бутун дунё бўйлаб тарқалмоқда. Илмий жиҳатдан у Туркманистонда тарқалмагани даргумон», — дейди ЖССТнинг фавқулодда вазиятлар бўйича катта ходими Кэтрин Смоллвуд.
Доктор Смоллвуднинг муносабати ЖССТнинг Туркманистон баёнотига биринчи оммавий эътирозидир, чунки мамлакатда норасмий манбалар COVID-19 ҳолатлари сони ортиб бораётгани ҳақида хабар бермоқда. Сентябрь охирида Туркманистон фуқаролари ЖССТга мурожаат қилиб, ундан Туркманистон ҳукуматини COVID-19 ни тан олишга мажбур қилишни сўраган эди.
Изоҳ (0)