Бухоро вилояти Когон шаҳрида тупроқ ўпирилиши оқибатида 2 киши ҳалок бўлгани тўғрисида хабар берилганди. Бандлик ва меҳнат муносабатлари вазирлиги юз берган мазкур ҳолатга расмий муносабат билдириб, комиссия бахтсиз ҳодиса сабабларини ўрганаётганини маълум қилди.
16 ноябрь куни соат 14:50 да Когон шаҳар «Дўстлик» МФЙ Дўстлик кўчасида «61-автокорхона» МЧЖ томонидан ер 5-6 метр чуқурликда, эни 3 метр оралиғида ковланган ҳолда 1000 миллиметрли сув қувурлари ётқизилаётган вақтда чуқурнинг чап томони ўпирилиб, икки нафар ишчини тупроқ ва қум босиб қолган. Вилоят Фавқулодда вазиятлар бошқармаси қутқарувчилари томонидан воқеа жойида олиб борилган тезкор қидирув ишлари натижасида икки нафар фуқаронинг жасади тупроқ остидан олиб чиқилган.
Ушбу ҳолат юзасидан Бухоро вилояти Бандлик бош бошқармасининг 18 ноябрдаги «Ишлаб чиқаришдаги бахтсиз ҳодисани махсус текшириш тўғрисида»ги 202-ИЧ-сонли буйруғи қабул қилинган. Таъкидланишича, айни пайтда буйруққа асосан тузилган комиссия рўй берган ҳодиса сабабларини ўрганмоқда. «Унинг якунига кўра қўшимча маълумот берилади», — дейилади муносабатда.
Аввалроқ Бухоро вилояти ИББ ҳолат юзасидан жиноят иши қўзғатилганини маълум қилганди.
«Қувурлар ётқизиш жараёнида эса улар устининг ярми қум билан тўлдирилиб, сўнг тупроқ билан ёпилади. Худди шу жараёнда ишчини қум ёки тупроқ босиб қўймаслиги учун мустаҳкам ёғоч ‘шит’лар ўрнатилади, ушбу шитлар ҳимоя вазифасини бажаради. Бироқ юқоридаги ҳолат чоғида чуқурликда ҳимояланиш учун ‘шит’ ўрнатаётган ёш ишчилар мувозанатни йўқотишган ва ‘шит’ олдинга силжиб кетган. Ўра юқорисида пастдаги икки нафар йигит билан ишлаб турган йигитлар ҳам кутилмаганда содир бўлган ўпирилиш оқибатида уларга кўмак бера олмаган. Икки ёш ишчи қум ва тупроқ остида қолиб кетган», — деганди вилоят «Сувоқава» раҳбари ўринбосари Бахтиёр Назаров.
Изоҳ (0)