Туркманистон президенти Гурбангули Бердимуҳамедов 17 ноябрь куни Ахал вилоятининг Бободайхон этрапидаги тўқимачилик мажмуасини тантанали равишда очиб берди.
Туркманистон раҳбари мажмуага вертолётда етиб келди. У ерда президентни Тўқимачилик саноати вазирлигининг «Докмаçйлар» маданият маркази ансамбли кутиб олди, ундан сўнг Бердимуҳамедов Туркманистон халқ артисти Жемал Сапарова билан суҳбатлашди.
Сўнг давлат раҳбари бинога кириб борди ва у ерда йиғилганлар олдида нутқ сўзлади. «Асосий мақсадимиз – мамлакатимизни саноати ривожланган, жаҳоннинг илғор давлатлари қаторига олиб чиқиш, халқнинг ижтимоий ва турмуш даражасини сезиларли даражада оширишдир», – деди президент.
151,8 миллион долларлик мажмуа 20 гектар майдонни эгаллаган. У маъмурий бино, саноат омборлари, устахона, 450 ўринли ошхона, спорт майдончаси ва 16 ўринли иккита меҳмонхонани ўз ичига олади.
Мажмуа йилига 5 минг тонна нозик толали пахтани қайта ишлаш ва йилига 3 300 тонна ип-калава, 20 миллион квадрат метр турли газламалар, жумладан, 18 миллион метр бўялган мато ва 3,5 миллион дона тайёр кийим-кечак ишлаб чиқаришга мўлжалланган.
«Импорт ўрнини босишга мўлжалланган янги корхонада ишлаб чиқарилаётган маҳсулотлар катта маблағни тежаб, ортиқча тайёр маҳсулотларни бошқа мамлакатларга етказиб бериш учун замин яратади», — деди Гурбангули Бердимуҳамедов ва мажмуа фойдаланишга топширилиши билан 1150 иш ўрни яратилишини қўшимча қилди.
Сўнгра йиғилганларга Rieter Management АG (Швейцария) ишбилармон доиралари раҳбари Рожер Албрехтнинг корхона очилиши муносабати билан президентга табриги акс этган видеоёзув намойиш этилди. Компания мажмуага ип-калава қадоқлаш ускунасини ўрнатган ва Туркманистон томонига тегишли сертификат тақдим этган. Picanol компаниясининг (Бельгия) директори, Rieter (Швейцария) компаниясининг акциядори Люк Так ҳам видеомурожаат йўллаб, улар 110 та тўқув дастгоҳини ўрнатиб берганини маълум қилди ва тегишли сертификатни тақдим этди.
Давлат раҳбари маърузалардан сўнг мажмуани тантанали равишда очиб, «махсус автотранспорт»да йигирув фабрикасига етиб борди. У ерда цехлар ишини кўздан кечирди, ишчилар билан суҳбатлашди.
Телерепортаждан олинган кадрларга қараганда, «махсус транспорт» Қозоғистон президенти Қосим-Жўмарт Тўқаев 2021 йилнинг 26 октябрь куни Ашхободга ташрифи чоғида Бердимуҳамедовга совға қилган микроавтобусдир. Бу ҳақда Туркманистон давлат ахборот агентлиги материалида қайд этилмаган.
У ерда Гурбангули Бердимуҳамедовга фабрика фаолияти ҳақида гапириб берилди, сўнг фабрикада ишлаб чиқариладиган тўқимачилик маҳсулотлари кўрсатилди. Тадбир якунида президент корхона жамоасига янги автобус, енгил ва юк автомобиллари калитларини топширди.
Эслатиб ўтамиз, 25 август куни Бердимуҳамедов Ахал вилётининг Каахки этрапида 1300 иш ўринга мўлжалланган қиймати 147 миллион 850 минг долларлик тўқимачилик мажмуасини очиб берганди.
Мавзуга доир:
Изоҳ (0)