Теҳрон АҚШнинг 18 ноябрь куни Эронга қарши жорий қилган янги санкцияларини қоралайди. Бу ҳақда Эрон Ташқи ишлар вазирлиги расмий вакили Саид Хатибзодага таяниб, «ТАСС» хабар берди.
«Эрон АҚШнинг янги санкцияларини максимал босим ўтказиш бўйича (АҚШ собиқ президенти) Дональд Трамп олиб борган муваффақиятсиз сиёсатнинг давоми деб билади, уларни қоралайди ва бу ҳаракатни ноқонуний деб билади», — дея унинг сўзларини келтирган ТИВ матбуот хизмати.
18 ноябрь куни АҚШ Эроннинг Emennet Pasargad киберкомпанияси ва унинг олти нафар ходимига санкциялар киритганди. Вашингтон наздида улар 2020 йилда бўлиб ўтган АҚШ президентлик сайловларига таъсир ўтказишга уринган.
Аввалроқ АҚШ президенти Жо Байден Эрон нефтига қарши Америка санкциялари сақланиб қолишини тасдиқлаган эди. Унинг сўзларига кўра, Теҳрондан нефть харид қилмаслик учун дунёда етарлича захира мавжуд.
Эслатиб ўтамиз, 2021 йил апрелдан июнгача Эрон ва яна бир нечта дунё етакчи давлатлари Венада Ядро дастури бўйича халқаро келишув режасига қайтиш юзасидан олти раундлик музокараларни ўтказган. Айни вақтда музокаралар жараёнида танаффус эълон қилинган.
«Биргаликдаги ҳаракатлар режаси» деб номланадиган келишув 2015 йил ёзида Теҳрон ҳамда бешта воситачи мамлакат ўртасида имзоланган. Кейинчалик Эроннинг мазкур келишувни қўпол равишда бузганликда айблашган. 2018 йил май ойи бошида АҚШ келишувдан бир томонлама чиқишини эълон қилган ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этганди.
Изоҳ (0)