Amazonия тропик ўрмонларининг кесилиши бир йил ичида 22 фоизга ошиб, сўнгги 15 йилдаги рекорд даражага етди. Бу ҳақда Космик тадқиқотлар агентлиги (INPE) ҳисоботига таяниб, BBC хабар берди.
Агентлик ҳисоботига кўра, 2020 йил 1 августдан 2021 йил 31 июлгача бўлган даврда қарийб 13 235 квадрат километр ўрмон йўқ қилинган, бу 2006 йилдан бери энг юқори кўрсаткичдир.
Бразилия атроф-муҳит вазири Жоаким Лейте «биз бу жиноятларга нисбатан қатъийроқ бўлишимиз керак», деди, аммо унинг таъкидлашича, маълумотлар сўнгги ойлардаги вазиятни унчалик ҳам аниқ акс эттирмайди.
Ноябрь ойи бошида Глазгода бўлиб ўтган Бирлашган Миллатлар Ташкилотининг иқлим бўйича COP26 саммитида ўрмонларни кесишни тўхтатиш ва 2030 йилга бориб ўрмонларнинг йўқолиб кетиши жараёнини тўхтатишга ваъда берган давлатлар ичида Бразилия ҳам бор эди.
Бразилиянинг амалдаги президенти Жаир Болсонару даврида Aмазониядаги ўрмонларни кесиш даражаси ошди. Шу сабабли Болсонару ўрмонларни йўқ қилишда ва «инсониятга қарши жиноятлар»да айбланган.
Aмазония тропик ўрмонларида тахминан уч миллион хил ўсимлик ва ҳайвон турлари, шунингдек, бир миллионга яқин маҳаллий аҳоли яшайди. Ушбу ўрмонлар бутун дунё бўйлаб глобал исиш тезлигини камайтириш учун ҳам керак.
Айни пайтда Frontiers in Forests and Global Change журнали март ойининг бошида чоп этган мақолада айтилишича, Aмазония тропик ўрмонлари 2007 йилдан буён атмосферага юта оладиганидан кўра кўпроқ карбонат ангидрид чиқарган. Маълум бўлишича, бу ўрмонлар йилига бир дан 4,2 миллиард тоннагача CO2 эквивалентидаги метанни чиқаради.
Science Advances 2020 йил декабрь ойида Бразилия тропик ўрмонлари ҳар йили гектарига 130 килограмм углеродни йўқотишини қайд этди. Иқлимшуносларнинг таъкидлашича, бу йўқотишлар Бразилияда ёғингарчиликнинг камайиши, иссиқлик тўлқинлари ва қурғоқчилик билан боғлиқ.
Изоҳ (0)