Саакашвилининг шифокори унинг соғлиғи кескин ёмонлашганини маълум қилди

Грузиянинг ҳибсда сақланаётган собиқ президенти Михаил Саакашвилининг соғлиғи 48 кунлик очликдан сўнг кескин ёмонлашган, жумладан, унда тери сарғайиши ва летаргия аломатлари мавжуд. Бу ҳақда Саакашвилининг шахсий шифокори Николоз Кипшидзе журналистларга маълум қилди.

Кипшидзе собиқ президент 2 октябрь куни «ўлимга олиб келувчи очлик» (яъни у комага тушиб қолган тақдирда ҳам қамоқхона шифокорларига уни ўзига келтиришни тақиқлаган) бошланганини эълон қилганидан сўнг, атайин АҚШдан ватанига қайтганди.

Шифокорнинг сўзларига кўра, организмдаги эндокринологик ва метаболик ўзгаришлар натижасида юзага келган тери сарғайиши аввалги кунларга нисбатан кучайган. Доктор Кипшидзе яқин кунларда бу ўзгаришлар тузатиб бўлмас ҳолга келишидан хавотирда.

Шуниси эътиборга лойиқки, Тбилиси чеккасидаги Глдани қамоқхонаси маъмурияти биринчи марта шахсий шифокорга қамоқхона касалхонасидаги ҳозир Михаил Саакашвили ётган палатага ташриф буюришга рухсат берди. Чунки Саакашвили ётоқдан туришга қийналмоқда ва мустақил равишда ҳаракатлана олмаяпти.

18 ноябрга ўтар кечаси Грузия омбудсмани Нино Ломжариянинг ташаббуси билан йиғилган шифокорлар кенгаши «бемор М.Саакашвилининг очликдан кейин тикланиш жараёнида зарур интенсив терапия учун уни шаҳар кўп тармоқли шифохонасига ўтказиш»ни тавсия қилди.

Инсон ҳуқуқлари бўйича Европа судининг «очликни зудлик билан тўхтатиш» бўйича қатъий тавсиясига қарамай, собиқ президент шаҳар клиникасига ўтказилгандан кейингина овқатлана бошлашини айтган. Ҳозиргача у фақат дори-дармонларни ва баъзи озуқавий қўшимчалар, жумладан, болалар бўтқаси ва чой истеъмол қилмоқда.

Шунга қарамай, Грузия ҳукумати Михаил Саакашвилини қамоқхона касалхонасида даволаш фикрида қатъий турибди, улар агар машҳур сиёсатчи шаҳар клиникасига ўтказилса, маҳбуснинг хавфсизлигини таъминлаш имкони бўлмай қолишдан ёки ўша клиника «инқилоб штаб-квартираси»га айланиб кетишидан хавотирда. Қамоқхона деворлари ортида туриб ҳам Михаил Саакашвили грузинларни ҳукуматни тинч ва зўравонликсиз алмаштиришга чақирмоқда.

Айни пайтда Украина омбудсмани Людмила Денисова бир неча кундан бери Тбилисида. У Грузия адлия вазири Рати Брегадзе билан Михаил Саакашвили атрофидаги вазиятни муҳокама қилиш учун учрашув ўтказишга интилмоқда. Саакашвили — Украина фуқароси, у ерда Ислоҳотлар миллий кенгаши ижроия қўмитаси раҳбари лавозимида ишлаган.

1 октябрь куни Михаил Саакашвили саккиз йилдан буён биринчи марта Грузияга келганди. Келиши биланоқ Тбилисида ҳибсга олинган, шундан сўнг очлик эълон қилган.