Ижтимоий тармоқларда Навоий вилояти Зарафшон туманида олтин қазиш ниятида бўлган 40–50 кишини қум босиб қолгани тўғрисида хабарлар тарқалганди. Фавқулодда вазиятлар вазирлиги ҳолат юзасидан ўрганиш олиб бориши ҳақида маълум қилганди.
ФВВнинг қайд этишича, дастлабки суриштирув ишлари олиб борилган ва 40–50 кишининг қум босиб қолганлигига оид маълумот ўз исботини топмаган.
Аслида 2021 йил 13 ноябрь куни соат 22:00 ларда Конимех тумани «Караката» ОФЙ ҳудудида жойлашган Лолазор номли чўл ҳудудида бир гуруҳ фуқаро тупроқ таркибидан тилла қумларини ковлаб олиш билан шуғулланган ва кутилмаганда қум остида қолган. Оқибатда 4 нафар фуқаро ҳаётдан кўз юмган.
Бош прокуратуранинг маълум қилишича, ҳолат юзасидан туман прокуратураси томонидан терговга қадар текшириш ҳаракатлари олиб борилмоқда.
Бундан аввал Бухорода сув қувурлари ётқизилаётган жойда ер ўпирилиши сабаб икки киши вафот этгани юзасидан жиноят иши қўзғатилгани ҳамда Сирдарёдаги даладан ФВВ туман бўлими ишчисининг жасади топилгани ҳақида хабар берилганди.
Изоҳ (0)