Фарғонада қўшнисининг ҳомиладор келинини пичоқлаб ўлдирган 29 ёшли фуқарога суд ҳукми билан 20 йил қамоқ жазоси тайинланди, дея хабар берди «Дарё» мухбири.
Жиноят ишлари бўйича Ёзёвон суди раиси Раҳматжон Араповнинг маълум қилинишича, Ёзёвон тумани «Қорасоқол» маҳалла фуқаролар йиғинида яшовчи 1992 йилда туғилган У.Н. интернет орқали мунтазам қимор ва таваккалчиликка асосланган ўйинлар ўйнаши натижасида 100 миллион сўмдан ортиқ пул ютқазиб, кўп миқдорда қарздор бўлиб қолган.
2021 йилнинг 22 июнь куни У.Н. қарзларидан қутулиш мақсадида қўшниси О.Қ.дан 2 минг доллар пул олган. Шундан сўнг У.Н. қўшнисининг уйида кўп миқдорда пул бўлиши мумкинлигини тахмин қилган. У 23 июнь куни соат 10:00 ларда қўшнисиникида ҳеч ким йўқлигидан фойдаланиб, унинг хонадонига ғайриқонуний тарзда кирган. Хонадондаги мол-мулкларни яширинча қўлга киритмоқчи бўлган вақтида қўшнисининг ҳомиладор келини М.Қ. келиб қолган.
У.Н. қилмиши ошкор бўлишидан қўрқиб, қўшни келинга пичоқ билан ҳужум қилган, танасининг турли соҳаларига тан жароҳатлари етказган. М.Қ. фаол қаршилик кўрсатиб, қўшниларни ёрдамга чақиргани учун У.Н. ҳодиса жойидан яширинган.
Фуқаро М.Қ. кўрсатилган тиббий ёрдамга қарамасдан, олган тан жароҳатлари натижасида шифохонанинг жонлантириш бўлимида вафот этган.
2021 йил 23 июнь куни мазкур ҳолат юзасидан Ёзёвон туман прокуратураси томонидан У.Н.га нисбатан Жиноят кодексининг 97-моддаси 2-қисми «б», «и» бандлари (ҳомиладорлиги айбдорга аён бўлган аёлни тамагирлик ниятида қасддан одам ўлдириш), 164-моддаси 3-қисми «в», «г» бандлари (уй-жойга, омборхона ёки бошқа биноларга ғайриқонуний равишда кирган ҳолда баданга оғир шикаст етказиб, босқинчилик қилиш) билан жиноят иши қўзғатилган.
2021 йил 5 октябрь куни Жиноят ишлари бўйича Ёзёвон тумани судининг ҳукми билан У.Н. Жиноят кодексининг 97-моддаси 2-қисми «б», «и» бандлари, 164-моддаси 3-қисми «в», «г» бандлари билан айбли деб топилиб, унга 20 йил озодликдан маҳрум қилиш жазоси тайинланган.
Бундан аввал Самарқандда қўшни аёлга 17 марта пичоқ урган эркакка ҳукм ўқилгани, Андижонда 18 ёшли йигит каналга оқизиб юборилгани айтилаётган хабар юзасидан жиноят иши қўзғатилгани ҳамда Қашқадарёда ўз укасининг оёқ-қўлларини сим билан боғлаб, тириклайин ёқиб юборган ака ушлангани ҳақида хабар берилганди.
Изоҳ (0)