Тошкентда бир гуруҳ кўнгиллилар жамоаси «Тошшаҳартрансхизмат» АЖ билан ҳамкорликда жамоат транспортида фроттеризм ва бошқа безорилик ҳолатларининг олдини олиш, уларга қарши курашиш бўйича махсус лойиҳани ташкил этди.
Шунингдек, лойиҳа сайти ва янги чипталар ишга туширилган бўлиб, унда транспортда тегажоғлик қурбони ёки гувоҳи бўлганда нима қилиш кераклиги ҳақида маълумот мавжуд. Бундан ташқари, Тошкент шаҳридаги жамоат транспортидан фойдаланувчилар орасида сўровнома ўтказилган.
Сайтда жамоат транспортида дуч келинган шилқимлик ҳақида маълум қилиш имконияти, бу каби ҳолатларда нима қилиш лозимлиги бўйича инструкция мавжуд.
2021 йилнинг август ойида турли ёшдаги аҳоли ўртасида тасодифий танлов асосида жамоат транспортидаги тегажоғлик ҳолатлари бўйича ижтимоий сўровнома ўтказилган (ўзбек ва рус тилларида).
Сўровномада 100 га яқин одам иштирок этган. Уларнинг 77,5 фоизи аёллар ва 22,5 фоизи эркаклар. Сўровнома натижаларига кўра: респондентларнинг 12,5 фоизи жамоат транспортида тез-тез, 40 фоизи эса жамоат транспортида бир-икки марта тегажоғликка дуч келган, бу муаммо нафақат аёллар, балки эркаклар билан ҳам содир бўлган. Сўровномада иштирок этган эркакларнинг уч нафари жамоат транспортида тегажоғликка дуч келган.
Шунингдек, респондентларнинг 60 фоизининг яқинлари ёки танишлари жамоат транспортида тегажоғлик ҳолатига дуч келган.
«Жамоат транспортида тегажоғлик ҳолатига дуч келганда қандай ҳаракат қилишни биласизми?» деган саволга респондентларнинг 51 фоизи «билмайман» деб жавоб берган.
Жабрланувчилардан ёрдам сўрамаслиги сабаблари ҳақида сўралганда, қуйидаги жавоблар олинди:
- ўзимни қандай тутишни билмайман — 49 фоиз;
- айбдорнинг жазоланишига ишонмайман — 22 фоиз;
- айбдорлик ва уят ҳисси — 19,5 фоиз;
- айбдордан қўрқиш — 8,5 фоиз.
Лойиҳанинг мақсади:
- ушбу муаммо бўйича аҳолининг хабардорлигини ошириш;
- жамоат транспортида безорилик ҳолатларига гувоҳ бўлган инсонларни бефарқ бўлмасликка чақириш;
- имкон қадар кўпроқ фроттеризм ҳолатларининг олдини олиш;
- жабрланувчиларга жим туриш уят эмаслигини ва муаммони эълон қилиш кераклигини етказиш;
- жамоат транспортида суркалиш ҳолатларини аниқлаш механизмларини ишлаб чиқиш;
- жабрланувчилар жамоат транспортида таъқиб қилинса, нима қилиши керак ва уларни ҳимоя қилиш бўйича кўрсатмалар ишлаб чиқиш.
Изоҳ (0)