Самарқандда савдо марказида хотини ва унинг жазманини пичоқлаб ўлдирган эркакка суд ҳукми ўқилди.
Эслатиб ўтамиз, 2020 йилнинг 20 ноябрь куни соат тахминан 18:00 ларда Мирзо Улуғбек кўчасида жойлашган савдо марказида 42 ёшли пастдарғомлик эркак дўконда турмуш ўртоғи ва унинг ўйнаши дея тахмин қилинган шахсга дуч келган ва одамлар орасида уларга пичоқ билан ташланган эди. Жабрланувчилар қон кетиши оқибатида воқеа жойида вафот этган.
Жиноят ишлари бўйича Самарқанд вилояти судининг «Дарё» сўровига асосан маълум қилишича, судланувчи М.А. дастлаб аёли билан ушлаб олган эркак — Р.Э.нинг ҳаёт учун муҳим бўлган юз, бўйин, қорин соҳаларига, сўнг турмуш ўртоғи Ш.А.нинг бош, бўйин, қорин соҳаларига кўплаб санчилган-кесилган тан жароҳатлари етказиб, уларни қасддан ўлдирган.
М.А. аёли Ш.А. билан 2006 йилда қонуний турмуш қурган, уч нафар фарзанди бор. 2012 йил апрель ойида улар Россияга ишлашда кетган, фарзандлари онасининг қарамоғида қолган. Аёли паспортини йўқотгани сабабли 2016 йилда Ўзбекистонга қайтган, эркакнинг ўзи ҳам Ўзбекистонга келиб даволаниб кетиб, 2019 йил 16 июль куни яна қайтиб келган.
2019 йил июль ойларида оиласи билан музқаймоқ егани боришганида турмуш ўртоғи дўкон сотувчиси Э.Р. билан кўз уриштиришганини кўриб, улар ўртасида бирор гап борлигига шубҳа қилган. Бу ҳақда турмуш ўртоғидан сўраганида ўрталарида ҳеч қандай алоқаси йўқлигини айтиб қасам ичган.
2020 йилнинг январь ойида турмуш ўртоғининг телефонини текширганида, Telegram’да Р.Э. билан ишқий мазмунда ёзишгани, бир-бирларига ишқий суратлар ва яланғоч аёлларнинг суратларини юборишганини кўриб, улар ўртасида ишқий муносабат борлигига ишонч ҳосил қилган.
Орадан анча вақт ўтиб, турмуш ўртоғи Ш.А. телефонда гаплашиб ўтирганини кўриб ким билан гаплашаётганини сўраганида, у опаси билан гаплашаётганини айтиб, телефонини унга бермасдан, ўзини олиб қочган. Шунда эр куч ишлатиб, турмуш ўртоғининг қўлидан телефонни тортиб олиб, уни яна Р.Э. билан гаплашаётганини билиб қолиб, урган.
Ўша йилнинг сентябрида ҳам аёлининг телефон аппаратини текширганида унинг Р.Э. билан гаплашаётганини билган, аммо турмуш ўртоғи у билан иш юзасидан гаплашгани, бошқа ҳеч қандай гап-сўз йўқлигини айтган. Ўша йилнинг ноябрь ойида аёл оилавий жанжал сабаб уйига кетиб қолган ва эри билан бошқа яшамаган.
2020 йил 20 ноябрида М.А. аёли Р.Э.нинг машинасига ўтирганини кўриб қолган ва турмуш ўртоғи билан никоҳдан ажрашмаган бўлсаларда, очиқдан очиқ унга хиёнат қилаётганидан жаҳли чиқиб, уйига келиб ошхонадан пластмасса дастали пичоқни олиб, уларнинг ортидан кузатиб борган ва дўконга кирганларида уларни пичоқлаб ташлаган.
Судланувчининг сўзларига кўра, жаҳл устида бўлгани учун ўзини йўқотиб қўйиб, кимга неча маротаба урганини эслай олмайди. Ўзига келган вақтида қўллари қон бўлиб, қўлида пичоқ турганини кўрган. Йўловчи машинада уйига бориб, ўғлига онасини бошқа эркак билан ушлаб олиб ўлдирганини айтиб, ҳайрлашган. Сўнг акаси билан ихтиёрий равишда Самарқанд вилояти ИИБга келиб, терговга бор ҳақиқатни айтиб берган.
У содир этган жиноятига тўлиқ иқрорлиги, қилган ишидан пушаймонлиги айтиб, суддан унга қонуний енгиллик беришни сўраган.
2021 йилнинг 24 февраль куни Самарқанд вилоят суди фуқаро М.А.ни Жиноят кодексининг 97-модда (қасддан одам ўлдириш) 2-қисми «а» ва «ж» бандларида содир этилган жиноятларни содир этганликда айбдор деб топган. Суд ҳукми билан унга 22 йил озодликдан маҳрум қилиш жазоси тайинланган.
Аввалроқ Самарқандда қўшни аёлга 17 марта пичоқ урган эркакка ҳукм ўқилгани, Қашқадарёда ўз укасининг оёқ-қўлларини сим билан боғлаб, тириклайин ёқиб юборган ака ушлангани, Наманганда эри воз кечгани учун овсинининг қизини каналга чўктириб юборган аёлга суд ҳукми ўқилгани тўғрисида хабар берилганди.
Изоҳ (0)