Қозоғистонда рўйхатдан ўтган Tiksi LTD корхонаси Ўзбекистондаги Mega Eco Export жамиятига етказиб берган буғдой ёрмаси учун умумий ҳисобда бир миллион доллардан зиёд маблағини ундира олмаяпти. Бу ҳақда Tiksi LTD корхонаси директори Александр Лоза «Дарё»га мурожаат қилди.
Маълум бўлишича, Қозоғистонда рўйхатдан ўтган Tiksi LTD корхонаси ва Ўзбекистондаги Mega Eco Export жамияти ўртасида 2018 йилнинг январь ойида буғдой ёрмасини етказиб бериш бўйича умумий қиймати 5 миллион 500 минг долларлик шартнома имзоланган. Келишувга кўра, маҳсулот етказиб берувчи Tiksi LTD корхонаси томонидан 2018 йилнинг июль–август ойларида Mega Eco Export жамиятига тоннаси 756 доллардан жами 1 миллион 400 минг тонна маҳсулот етказиб берилган. Аммо Mega Eco Export корхонаси 1 миллион 71 минг долларлик маҳсулотни қабул қилиб олган бўлса-да, маблағларни етказиб берувчига кўрсатилган муддатда тўлаб бермаган.
«Қарзни қайтариш бўйича оғзаки ҳамда ёзма мурожаатлар қилдик, фойдаси бўлмади. Биз ҳам тадбиркормиз, кредит олиб, бизнес қиламиз. Маҳсулот учун олинган пуллар банк кредитлари ҳисобига олинганлиги, ушбу пуллар бўйича корхонанинг кредит мажбурияти борлиги ҳақида Mega Eco Export корхонасига бир неча маротаба тушунтирдик, лекин натижа йўқ. Ҳар гал ҳар хил баҳоналар қилиб, пулимизни қайтаришни ортга суриб келишди», – деди Tiksi LTD корхонаси раҳбари Александр Лоза.
Бу орада Mega Eco Export жамияти Tiksi LTD корхонасидан буғдой ёрмасини етказиб беришни тўхтатмасликни, Ўзбекистонда буғдойнинг нархи бир неча баробар қимматлигини айтиб, яна маҳсулот етказиб беришларини сўрайди.
«Mega Eco Export жамияти раҳбарияти бизга алоқага чиқиб, буғдойга Ўзбекистонда талаб катта, юбораверинглар, аввалги юборган маҳсулотларингнинг пуллари сотган корхоналардан етиб келмади, озроқ кутинглар, яна маҳсулот жўнацанглар, пулини аввалги қарзимизга қўшиб, тез орада қайтарамиз, деб ваъда беришди. Биз уларнинг гапига ишониб, 2019 йилнинг февраль ойида Mega Eco Export жамиятига 214 минг долларлик буғдой маҳсулоти етказиб бердик. Яна ваъда қилинган вақтда пулни қайтаришмади. Улар Mega Eco Export жамиятида солиқ идораси текшириш ўтказиб, корхона ҳисоб рақамига тақиқ қўйилганини, текшириш якунидан сўнг пул маблағини тўлаб беришини айтишди. Лекин ҳалигача Mega Eco Export жамияти Tiksi LTD корхонаси олдидаги икки шартнома бўйича 1 миллион 260 минг долларлик қарзни қайтармаяпти», — деди Александр Лоза.
Икки ўртада келишув шартномаси бўлса, нима учун судга мурожаат қилмайсизлар, деган саволга Tiksi LTD корхонаси раҳбари қуйидагича жавоб берди:
«Тўғри, ўртада шартнома бор, бу орқали судга мурожаат қилишимиз ва ютиб чиқишимиз мумкин. Билишимизча, Mega Eco Export жамиятининг олдимиздаги қарздорликни қайтариш имконияти йўқ. Биринчидан, уларнинг ҳисоб рақамига тақиқ қўйилган. Иккинчидан, маҳсулот сотишган бўлса-да, ўз ҳисобига кирим қилишмаган. Бизни ҳайрон қолдирган нарса — бунга Ўзбекистондаги ҳуқуқ-тартибот идоралари эътибор қилишмаяпти. Прокуратурага ҳам ёздик, фойдаси бўлмади, судга мурожаат қилинглар, деган жавоб келди», — деди Александр Лоза.
Ҳолатга ойдинлик киритиш мақсадида «Дарё» мухбири Mega Eco Export жамиятига мурожаат қилди. Жамият раҳбари Алишер Асқаровнинг айтишича, Tiksi LTD корхонаси билдираётган фикрлар асоссиз.
«Ҳақиқатан ҳам буғдой ёрмасини етказиб бериш бўйича Tiksi LTD корхонаси билан шартнома тузганмиз. Биз улардан маҳсулот сотиб олиб, Ўзбекистондаги корхоналарга сотамиз. Tiksi LTD корхонаси билан халқаро савдо учун яратилган электрон база орқали шартнома тузганмиз. Барча сотиб олинган, қабул қилинган маҳсулотлар ўша орқали ҳисоб-китоб қилинган ва пуллар ўз вақтида тўлаб берилган. Аслида биз улардан эмас, улар биздан қарздор. Буларнинг барчаси электрон келишувларимизда кўриниб турибди», — деди Mega Eco Export жамияти раҳбари.
Mega Eco Export жамияти раҳбари Алишер Асқаров шартномаларнинг электрон кўринишидан нусха юборишини айтди. Лекин айтилган вақтдан бир неча ой ўтган бўлса-да, ҳужжатлар «Дарё» таҳририятига тақдим этилмади.
Ўйлаймизки, Ўзбекистондаги тадбиркорларни қўллаб-қувватлаш учун масъул идоралар ва ҳуқуқни муҳофаза қилувчи органлар икки тадбиркор ўртасидаги масалага қонуний ечим кўрсатишади.
Изоҳ (0)